এক বিস্ফোৰণত তুৰস্কৰ এটা কয়লা খনি কঁপি উঠে। তাৰ ফলত কমেও ২৫ জন লোকৰ মৃত্যু হয়। ইফালে বিস্ফোৰণৰ বাবে ভূমিস্খলনে বাহিৰলৈ ওলাই অহাৰ পথ বন্ধ কৰি দিয়াৰ বাবে এতিয়াও কমেও ১২ জন লোক মাটিৰ গভীৰত আবদ্ধ হৈ আছে।
উত্তৰ তুৰস্কৰ বাৰ্টিন প্ৰদেশৰ এটা খনিত শুকুৰবাৰে নিশা সংঘটিত হয় এক ভয়ংকৰ বিস্ফোৰণ। দুৰ্ঘটনা সংঘটিত হোৱাৰ সময়ত প্ৰায় ১১০ জন শ্ৰমিক খনিটোত কৰ্মৰত আছিল। ইয়াৰে অৰ্ধ সংখ্যকে খনিটোত প্ৰায় ৩০০ মিটাৰ গভীৰতাত কাম কৰি আছিল। তুৰস্কৰ স্বাস্থ্যমন্ত্ৰী ফাহৰেটিন কোকাই উদ্ধাৰৰ কাম ক্ষিপ্ৰতাৰে চলি আছে বুলি কয়। উক্ত স্থানত ৫১ খন এম্বুলেন্স উপস্থিত হোৱাৰ লগতে ৪ টা জৰুৰীকালীন সঁহাৰি কেন্দ্ৰ স্থাপন কৰা হৈছে।
উদ্ধাৰ অভিযানত সহায় কৰিবলৈ অতিৰিক্ত বাহিনীও মোতায়েন কৰা হৈছে। এতিয়ালৈকে ১১ জন শ্ৰমিকক খনিটোৰ পৰা উদ্ধাৰ কৰা হৈছে আৰু চিকিৎসাধীন হৈ আছে। কʼলা সাগৰৰ উপকূলৰ আমাছৰা অঞ্চলত অৱস্থিত খনিটোৰ পৰা উদ্ধাৰ কৰা লোকসকলৰ অৱস্থা সংকটজনক। গতিকে মৃতকৰ সংখ্যা বৃদ্ধি হোৱাৰ সম্ভাৱনা আছে।
বিস্ফোৰণত এতিয়াও সন্ধানহীন হৈ থকা লোকসকলৰ পৰিয়ালৰ লোকে খনি এলেকাত ভিৰ কৰিছে। তুৰস্কৰ স্বৰাজ মন্ত্ৰী চুলেমান ছলুৱে কয় যে খনিটোৰ ৩০০ৰ পৰা ৩৫০ মিটাৰ দ অংশটোৱেই আটাইতকৈ বেছি দুৰ্বল। তাত প্ৰায় ৪৯ জন শ্ৰমিকে কাম কৰি আছিল। উদ্ধাৰকাৰী এতিয়াও তাত উপস্থিত হʼব পৰা নাই।
বিস্ফোৰণৰ কাৰণ এতিয়াও জানিব পৰা হোৱা নাই। তদন্ত আৰম্ভ হৈছে। প্ৰথম অৱস্থাত খনিটোত মিথেন গেছ জমা হোৱাৰ বাবেই এই বিস্ফোৰণ সংঘটিত হোৱা বুলি ধাৰণা কৰা হৈছে। আজি তুৰ্কীৰ ৰাষ্ট্ৰপতি ৰেচেপ তায়িপ এৰদোগানে এই স্থান পৰিদৰ্শন কৰে।
