৭৬ বছৰ বয়সতো গুজৰাটৰ বিজেপিৰ প্ৰাৰ্থী যোগেশ পেটেলে নিৰ্বাচনী দৌৰত যোগদান কৰে। বয়সৰ বিষয়ে সোধাত তেওঁ আমেৰিকাৰ ৰাষ্ট্ৰপতি জো বাইডেনক উদাহৰণ হিচাপে দাঙি ধৰে। যোগেশৰ মতে নিৰ্বাচনী যুঁজত বয়স বাধা হʼব নোৱাৰে। প্ৰাৰ্থীৰ সক্ৰিয়তাহে আচল কথা।
উল্লেখ্য, অহা ১ আৰু ৫ ডিচেম্বৰত গুজৰাটত বিধানসভা নিৰ্বাচন। তেওঁ বৰোদাৰ মঞ্জলপুৰ বিধানসভা সমষ্টিৰ পৰা প্ৰতিদ্বন্দ্বিতা কৰিব। অষ্টম কাৰ্যকালৰ বাবে প্ৰতিদ্বন্দ্বিতা কৰাৰ পিছত যোগেশে কয়, “জো বাইডেনক চাওক। আশী বছৰ বয়সতো এতিয়াও আমেৰিকা পৰিচালনা কৰি আছে। জো বাইডেনে যদি আশীত কৰিব পাৰে, তেনেহলে ছয়সত্তৰত ময়ো পাৰো!”
যদিও বিজেপিৰ প্ৰাৰ্থীৰ বয়সৰ সীমা ৭৫ পৰ্যন্ত নিৰ্ধাৰণ কৰা হৈছে, তথাপিও যোগেশৰ অদম্য মনোভাবৰ ওচৰত কাৰ্যতঃ শিৰ নত দলৰ নেতৃত্বৰ।
প্ৰায় ৩ দশক পূৰ্বে প্ৰথমবাৰৰ বাবে বিধানসভা নিৰ্বাচনত অৱতীৰ্ণ হোৱা যোগেশে দাবী কৰে যে তেওঁ ৰাইজৰ বাবে কাম কৰি আছে। বিধায়ক নহওঁতেও মানুহৰ লগত তেওঁৰ সম্পৰ্ক বিচ্ছিন্ন হোৱা নাছিল। মঞ্জলপুৰৰ পৰা জয়ী হʼব বুলি আশাবাদী যোগেশ। তেওঁৰ দাবী, ৭৬ বছৰ বয়সতো তেওঁৰ সজীৱ শক্তিৰ অভাৱ নহয়। ফলত এই বয়সতো ভোটদান প্ৰক্ৰিয়াত উত্তীৰ্ণ হʼব।
গুজৰাট বিধানসভাত ৩২ বছৰ বিধায়ক হিচাপে কটোৱা যোগেশে আপ বা কংগ্ৰেছৰ প্ৰাৰ্থীৰ জমা ধন জব্দ হ’ব বুলি দাবী জনাই কয় যে তেওঁ পুনৰ জয়ী হʼব। যোগেশে মন্তব্য কৰে, “৮ ডিচেম্বৰলৈ অপেক্ষা কৰক।” উল্লেখ্য, সেইদিনা গুজৰাট বিধানসভাৰ ফলাফল ঘোষণা কৰা হ’ব।
