ব্ৰিটিছ ব্ৰডকাষ্টিং কৰ্প’ৰেচনৰ (বিবিচি) (British Broadcasting Corporation) দিল্লী আৰু মুম্বাই কাৰ্যালয়ত আয়কৰ বিভাগে কৰা “তদন্ত”ক লৈ ভাৰতীয় সংবাদ মাধ্যমসমূহৰ সম্পাদকসকলৰ সংগঠন ইণ্ডিয়ান এডিটৰ্চ গিল্ডে (Editors Guild) “গভীৰ উদ্বেগ” প্ৰকাশ কৰিছে।প্ৰেছ ক্লাব অৱ ইণ্ডিয়াই (Press Club of India) মঙলবাৰে বিবিচিৰ
কাৰ্যালয়ত আয়কৰৰ ‘সমীক্ষাʼক গৰিহণা দি এক বিবৃতি প্ৰকাশ কৰে।
ইণ্ডিয়ান এডিটৰ্চ গিল্ডে এক বিবৃতিত কয় যে চৰকাৰী সংস্থাসমূহে চৰকাৰক সমালোচনা কৰা সংবাদ মাধ্যমক ভয় দেখুৱাই হাৰাশাস্তি কৰাৰ প্ৰৱণতা অব্যাহত থকাৰ বাবে আমি হতাশ হৈছো।
বিবিচিৰ দৰে সুপৰিচিত আন্তঃৰাষ্ট্ৰীয় সংবাদ মাধ্যমৰ ওপৰত চৰকাৰী সংস্থাৰ আক্ৰমণে বিশ্বৰ সৰ্ববৃহৎ গণতন্ত্ৰ ভাৰতৰ ভাবমূৰ্তি কলংকিত কৰিব বুলি অভিযোগ উত্থাপন কৰিছে প্ৰেছ ক্লাব অৱ ইণ্ডিয়াই। বিবৃতিটোত কোৱা হৈছে যে আমি চৰকাৰক আহ্বান জনাইছো যে ইয়াৰ সংস্থাসমূহে সংবাদ মাধ্যমক ভয় খুৱাবলৈ ক্ষমতাৰ অপব্যৱহাৰ কৰাটো বন্ধ কৰক।
উল্লেখ্য, মোদীৰ তথ্যচিত্ৰক লৈ বিতৰ্কৰ মাজতে বিবিচিৰ কাৰ্যালয়ত এই আয়কৰ ‘সমীক্ষা’ সংঘটিত হৈছিল। কেইসপ্তাহমানৰ আগতে মোদী চৰকাৰে বিবিচিৰ তথ্যচিত্ৰ ‘ইণ্ডিয়া: দা মোদী কোৱেশ্চনʼৰ প্ৰদৰ্শন বন্ধ কৰিবলৈ ‘তৎপৰতা’ আৰম্ভ কৰিছিল। একঘণ্টীয়া তথ্যচিত্ৰখনত দুটা দশক পূৰ্বে তদানীন্তন গুজৰাটৰ মুখ্যমন্ত্ৰী নৰেন্দ্ৰ মোদীৰ (Narendra Modi) কাৰ্যকালত গোধৰা কাণ্ড আৰু তাৰ পাছৰ সাম্প্ৰদায়িক হিংসাৰ ওপৰত আলোকপাত কৰা হৈছে।
কেন্দ্ৰীয় চৰকাৰে আৰম্ভণিৰে পৰাই ‘দা মোদী কোৱেশ্চনʼ (The Modi Question) ক লৈ আপত্তি কৰি আহিছে। ইয়াক ‘অপপ্ৰচাৰ’ বুলি অভিহিত কৰি এই তথ্যচিত্ৰখন ঔপনিৱেশিক মানসিকতাৰ পৰাই সৃষ্টি কৰা বুলি দাবী কৰা হৈছিল।যদিও বিবিচিয়ে দাবী কৰিছে, যথেষ্ট গৱেষণাৰ অন্তত এই তথ্যচিত্ৰখন নিৰ্মাণ কৰা হৈছে।
এই পৰিস্থিতিত জানুৱাৰী মাহৰ শেষৰ ফালে কেন্দ্ৰই ইউটিউব আৰু টুইটাৰক ছচিয়েল মিডিয়াৰ পৰা বিবিচিৰ তথ্যচিত্ৰৰ লিংক আঁতৰাবলৈ নিৰ্দেশ দিছিল। ইয়াৰ উপৰি কেন্দ্ৰীয় তথ্য আৰু প্ৰযুক্তি মন্ত্ৰালয়ক আই টি নিয়ম ২০২১ৰ জৰুৰীকালীন ক্ষমতা আৰোপ কৰি কেইবাটাও টুইট উঠাই দিবলৈও নিৰ্দেশ দিয়া হৈছিল। সেই সময়ত জে এন ইউকে ধৰি বিভিন্ন শিক্ষানুষ্ঠানত তথ্যচিত্ৰ প্ৰদৰ্শন বন্ধ কৰিবলৈ চৰকাৰৰ ‘তৎপৰতা’ চকুত পৰিছিল।
কংগ্ৰেছকে ধৰি বিৰোধী নেতাসকলে তেতিয়াৰ পৰাই বিষয়টোক ‘চেন্সৰশ্বিপ’ বুলি অভিহিত কৰি আহিছে। মঙলবাৰে বিবিচিৰ কাৰ্যালয়ত আয়কৰ অভিযানত কংগ্ৰেছ নেতা জয়ৰাম ৰমেশৰ (Jairam Ramesh) প্ৰতিক্ৰিয়া- “দেশত অঘোষিত জৰুৰীকালীন অৱস্থা চলিছে।”
