দেশত ক্ৰমান্বয়ে বৃদ্ধি পাবলৈ ধৰিছে কৰোনা (Corona) ৰোগীৰ সংখ্যা। বছৰৰ প্ৰথম দিন শনিবাৰে পৰিসংখ্যাক লৈ চিন্তিত হৈ পৰে বিশেষজ্ঞসকল। কাৰণ সংক্ৰমণ ১০ হাজাৰৰ তললৈ যোৱা নাই।কেন্দ্ৰীয় স্বাস্থ্য মন্ত্ৰালয়ৰ(Health Ministry) পৰিসংখ্যা অনুসৰি দেশত যোৱা ২৪ ঘণ্টাত ১০ হাজাৰ ৭৫৩ জন লোক কৰোনাত আক্ৰান্ত হৈছে।
অৱশ্যে দৈনিক আক্ৰান্তৰ সংখ্যা শুকুৰবাৰতকৈ কিছু কম। শুকুৰবাৰে সংক্ৰমণ অতিক্ৰম কৰে ১১ হাজাৰ।শুকুৰবাৰৰ তুলনাত শনিবাৰে মৃত্যুৰ সংখ্যাও সামান্য হ্ৰাস পাইছে। যোৱা ২৪ ঘণ্টাত দেশত ২৭ জন কৰোনা ৰোগীৰ মৃত্যু হৈছে। যিটো যোৱা দিনতকৈ ২ কম।
কেন্দ্ৰীয় পৰিসংখ্যা অনুসৰি, দেশত কৰোনা আক্ৰান্ত ৰোগীৰ সংখ্যা হʼল ৫৩ হাজাৰ ৭২০ জন। দৈনিক সংক্ৰমণৰ হাৰ ৬.৭৮ শতাংশ হৈছেগৈ। চিকিৎসকৰ মতে শেহতীয়াকৈ চকু কপালত তুলিব পৰা কৰোনাৰ প্ৰকাৰৰ নাম XBB.1.16। ই অমিক্ৰনৰ এটি উপৰূপ।
অৱশ্যে কেন্দ্ৰই জনাইছে যে কোভিড পৰিস্থিতি নিয়ন্ত্ৰণত আছে। বৰ্তমান পৰিসংখ্যাত আতংকিত হোৱাৰ কোনো কাৰণ নাই। কেন্দ্ৰীয় স্বাস্থ্যমন্ত্ৰী মানচুখ মাণ্ডবিয়াই পূৰ্বেও কৈছিল যে আগন্তুক আঠৰ পৰা দহ দিনত ক্ৰমান্বয়ে সংক্ৰমণ বৃদ্ধি পাব, কিন্তু তাৰ পিছত পুনৰ হ্ৰাস হʼবলৈ আৰম্ভ কৰিব। স্বাস্থ্য কৰ্তৃপক্ষইও দাবী কৰিছে যে অহা মাহৰ আৰম্ভণিৰ পৰাই পৰিস্থিতি স্বাভাৱিক হʼবলৈ আৰম্ভ কৰিব।
একে সময়তে একাংশ চিকিৎসকে দাবী কৰিছে যে কৰোনা এতিয়া মহামাৰীৰ পৰ্যায়ত নাই। অৱশ্যে ইয়াৰ বাবে প্ৰতিবন্ধকতা আৰোপ কৰাৰ কোনো কাৰণ নাই বুলি তেওঁলোকে কয়।বৃহৎ সংখ্যক চিকিৎসকে মাস্ক পৰিধান, হাত ধোৱা, কৰোনা পৰীক্ষা কৰা আদি নিয়মৰ প্ৰতি বিশেষ গুৰুত্ব দিবলৈ কয়। তেওঁলোকৰ মতে, এই ভাইৰাছৰ বিৰুদ্ধে যুঁজ দিয়াৰ মূল চাবিকাঠি হʼল সাৱধানতা।
