এইবাৰ ১ জুলাইৰ পৰা আৰম্ভ হ’ব অমৰনাথ যাত্ৰা(Amarnath Yatra)। এই যাত্ৰা ৩১ আগষ্টলৈকে চলিব। শুকুৰবাৰে ঘোষণা কৰা হৈছে এই তীৰ্থযাত্ৰাৰ সময়সূচী। ১৭ এপ্ৰিলৰ পৰা আৰম্ভ হʼব তীৰ্থযাত্ৰাৰ বাবে পঞ্জীয়ন প্ৰক্ৰিয়া।
শুকুৰবাৰে জম্মু-কাশ্মীৰৰ ৰাজভৱনত উপ-ৰাজ্যপাল মনোজ সিনহাৰ অধ্যক্ষতাত শ্ৰীঅমৰনাথজী শ্ৰাইন বোৰ্ডৰ এখন বৈঠক অনুষ্ঠিত হয়। সেই বৈঠকৰ পিছতেই অমৰনাথ যাত্ৰাৰ আৰম্ভণিৰ দিন ঘোষণা কৰা হয়। উপ-ৰাজ্যপালগৰাকীয়ে কয় যে তীৰ্থযাত্ৰা সুচাৰুৰূপে সমাপ্ত কৰাৰ বাবে সকলো ব্যৱস্থা কৰা হৈছে।
তেওঁ কয়, “প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহৰ মূল লক্ষ্য হৈছে কোনো অসুবিধা নোহোৱাকৈ তীৰ্থযাত্ৰা সম্পূৰ্ণ কৰা। তীৰ্থযাত্ৰীসকলে যাতে কোনো অসুবিধাৰ সন্মুখীন নহয় তাৰ বাবে সকলো ব্যৱস্থা কৰা হʼব।”
অনন্তনাগ জিলাৰ পাহেলগাঁও আৰু গণ্ডাৰৱাল জিলাৰ বালতালৰ পৰা আৰম্ভ হʼব অমৰনাথ যাত্ৰা। তীৰ্থযাত্ৰাক কেন্দ্ৰ কৰি নিৰাপত্তা সুদৃঢ় কৰা হʼব বুলি প্ৰশাসনে জানিবলৈ দিয়ে। অমৰনাথ কৰ্তৃপক্ষই জনোৱা মতে, পুৱা আৰু গধূলি তীৰ্থযাত্ৰীৰ বাবে পোনপটীয়া সম্প্ৰচাৰৰ ব্যৱস্থা কৰা হʼব। অমৰনাথ যাত্ৰাৰ সৈতে জড়িত যাৱতীয় তথ্য লাভ কৰিবলৈ গুগল প্লে ষ্টোৰত এটা এপ সৃষ্টি কৰা হৈছে।
