কাৰবি আংলঙৰ শিক্ষা ব্যৱস্থাৰ ব্যাপক সংস্কাৰৰ বাবে কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্যৰ নেতৃত্বত শিক্ষা বিভাগৰ ইএম ৰিচাৰ্ড টকবীৰ সহযোগত জিলা শিক্ষা বিভাগৰ উদ্যোগত (Initiatives of Education Department) আজি ডিফুত কাৰবি আংলং আৰু পশ্চিম কাৰবি আংলঙৰ বিদ্যালয়সমূহৰ ১২১৭ গৰাকী শিক্ষক-শিক্ষয়িত্ৰী (1217 teachers)লৈ আগবঢ়োৱা হৈছে অত্যাধুনিক প্ৰযুক্তিৰ টেবলেট-পিচি (Tablet-PC)৷
ডিফু (Diphu)ৰ মাটিপুঙৰ লাংকুং হাবে মেম’ৰিয়েল টাউন হলত এক গাম্ভীৰ্যপূৰ্ণ সভাত এই টেবলেট-পিচিসমূহ আনুষ্ঠানিকভাবে বিতৰণ (Distribution) কৰা হয় ৷ দুয়োখন পাৰ্বত্য জিলাৰ মুঠ ১১টা খণ্ড উন্নয়নৰ ৬৬০ খন বিদ্যালয়ৰ ১২১৭ গৰাকী শিক্ষক-শিক্ষয়িত্ৰীক এই টেবলেট পিচি প্ৰদান কৰা হয়৷
সাংসদ হৰেণছিং বে’, বিধায়ক বিদ্যাছিং ইংলেঙ, কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য ডঃ তুলিৰাম ৰংহাঙ, শিক্ষা বিভাগৰ ইএম ৰিচাৰ্ড টকবী, পৰিষদৰ কেইবাগৰাকী ইএম আৰু এমএচিৰ লগতে শিক্ষা বিভাগৰ বিষয়া-কৰ্মীসকল উপস্থিত থাকে৷
সাংবাদিকৰ সৈতে হোৱা বাৰ্তালাপত মুখ্য কাৰ্যবাহী সদস্য তুলিৰাম ডঃ ৰংহাঙে কয় যে, কাৰবি আংলঙৰ শিক্ষা পদ্ধতিৰ পৰিৱৰ্তন আৰু সংস্কাৰৰ খাতিৰত এনে প্ৰচেষ্ট্ হাততলৈ শিক্ষক-শিক্ষয়িত্ৰী সকলৰ সুবিধা হোৱাকৈ টেবলেট পিচি সমূহ প্ৰদান কৰা হৈছে ৷ এই টেবলেট পিচি সমূহৰ জৰিয়তে শিক্ষক-শিক্ষয়িত্ৰি সকলৰ বিদ্যালয়ত উপস্থিতি, মধ্যাহ্ন ভোজন আদি বিষয় সমূহ মনিটৰিং কৰা হ’ব ৷ বিদ্যালয়সমূহৰ ছাত্ৰ-ছাত্ৰীৰ পৰিসংখ্যা অনুযায়ী কিছু নিয়মাৱলী আৰু কাইটেৰিয়াৰ মাজেৰে এই টেবলেট পিচি সমূহ প্ৰদান কৰা হৈছে ৷
ভাষণ প্ৰসংগত সাংসদ হৰেণছিং বে’ই কয় যে, গুণোৎসৱে শিক্ষাৰ মানদণ্ড নিৰুপন কৰে ৷ ‘শিক্ষাৰ ঘাই শিপাডাল বৰ তিতা, কিন্তু ইয়াৰ ফল বৰ মিঠা’ ৷ এই আপ্ত বাক্যশাৰী সোঁৱৰাই কয়যে মানুহে কেৱল ফলৰ প্ৰশংসা কৰে কিন্ত গুৰি স্বৰূপ শিক্ষকৰ প্ৰশংসা নকৰে অথচ শিক্ষকে ছাত্ৰ-ছাত্ৰীৰ সোণালী ভৱিষ্যত গঢ়ে৷ ডিজিটেল যুগত শিক্ষকসকলক প্ৰদান কৰা এই টেবলেট পিচিসমূহে ছাত্ৰ-ছাত্ৰীৰ শিক্ষাৰ বাবে নতুন কনটেণ্ট আহৰণ কৰাত সুবিধা হ’ব বুলি কয় ৷
আনহাতে বিধায়ক বিদ্যাছিং ইংলেঙে নিজৰ বহুমূলীয়া ভাষণত কয় যে, আজিৰ পৰা শিক্ষকসকলে লাভ কৰা এই নতুন টেবলেট পিচিসমুহৰ জৰিয়তে জিলাখনৰ শিক্ষকসকল উপকৃত হ’ব ৷ নতুন যুগৰ পৰিৱৰ্তনৰ ভাৱ লৈ আগবাঢ়ি গৈ নতুন প্ৰজন্মৰ ভৱিষ্যত গঢ়া লগতে ছাত্ৰ-ছাত্ৰীসকলৰ ভাল ফলাফলৰ বাবে শিক্ষক সমাজ অধিক যত্নৱান হ’ব লাগিব বুলি কয় ৷
