Dhubri Dowry Case I ধুবুৰী জিলাত সংঘটিত হৈছে জঘণ্য কাণ্ডঃ যৌতুকৰ বাবে তিনিমহীয়া সন্তানৰ মাতৃক হত্যা-

ধুবুৰী জিলাৰ (Dhubri) আগমণি আৰক্ষী থানাৰ অন্তৰ্গত ঝসকাল গাঁৱত সংঘটিত হৈছে এক জঘণ্য কাণ্ড। যৌতুক (Dowry) নিদিয়াৰ বাবে তিনিমহীয়া সন্তানৰ মাতৃ ৰহিমা খাতুনক স্বামী ৰুবুল হুচেইন তথা স্বামীৰ গৃহৰ পৰিয়ালৰ লোকে গাত কেৰাচিল ঢালি হত্যা কৰে।

বিন্নাচৰা গাঁৱৰ ওচমান গনীয়ে নিজ কন্যাক দুই বছৰ পূৰ্বে ৰুবুল হুচেইনৰ লগত বিয়া দিয়ে যদিও বিয়াৰ দিন ধৰি কন্যা গৰাকীয়ে যৌতুকৰ বাবে অকথ্য নিৰ্যাতনৰ সন্মুখীন হয়। নিৰ্যাতনৰ চৰম পৰ্যায়ত উপনীত হৈ কালি দুপৰীয়া নিজ পত্নীক ৰুবুলে মুখত সোপা দি হাত-ভৰি বান্ধি জুই লগাই হত্যাৰ চেষ্টা কৰে।

ওচৰ-চুবুৰীয়াৰ এই কথা বোধগম্য হোৱাত তাইক উদ্ধাৰ কৰি ধুবুৰী চিকিৎসা মহাবিদ্যালয়লৈ লৈ যায় আৰু পিতৃগৃহত খবৰ দিয়ে। চিকিৎসালয়লৈ লৈ যোৱাৰ পথতে শেষ নিশ্বাস ত্যাগ কৰে বোৱাৰী গৰাকীয়ে।

সম্প্ৰতি স্বামীগৃহৰ সদস্য সকল পলাতক অৱস্থাত আছে। মহিলা গৰাকীৰ এজাহাৰৰ ভিত্তিত স্বামী ৰুবুল হুছেইন, ৰমিজা বিবি, ৰেজিমা খাতুন, এনামূল হক, ফেৰেজা বিবি, জহৰুল হুছেইনকে ধৰি ছয় জনক অভিযুক্ত কৰি ৯৮/২০২২ নম্বৰত গোচৰ ৰুজু কৰি তদন্ত অব্যাহত ৰাখিছে ।