ধাৰাসাৰ বৰষুণ (Heavy rain)ত পথ ভাঙি যোৱাৰ ফলত উত্তৰ ছিকিমত আবদ্ধ (Stranded in North Sikkim) হৈ আছে ২ হাজাৰৰো অধিক পৰ্যটক। যোৱা বৃহস্পতিবাৰৰ পৰা উত্তৰ ছিকিমত এই পৰিস্থিতিৰ সৃষ্টি হৈছে। ধাৰাসাৰ বৰষুণৰ ফলত বিভিন্ন নদী ওফন্দি উঠিছে।
উত্তৰ ছিকিমৰ মংগানৰ পৰা চুংথাংলৈ যোৱা পথত যাতায়াত ব্যাহত (Traffic on road from Mongan to Chungthang disrupted) হৈছে বুলি ৰাজ্য প্ৰশাসনে জানিবলৈ দিয়ে। মংগন জিলা প্ৰশাসনে জনোৱা মতে, ভূমিস্খলনৰ বাবে কেইবাটাও পথ অৱৰোধ কৰা হৈছে। চাংগু হ্ৰদ, নাথুলা, বাবা মন্দিৰৰ দৰে জনপ্ৰিয় পৰ্যটনস্থলীলৈ যোৱা সংযোগী পথত জৱাহৰলাল নেহৰু মৰ্চাৰীৰ সমীপতো ভাঙি পৰে।
এই পৰিস্থিতিৰ বাবে ১৯৭৫ জন ঘৰুৱা পৰ্যটক, ৩৬ জন বিদেশী পৰ্যটক লাচেন আৰু লাচুং অঞ্চলৰ হোটেলত আবদ্ধ হৈ আছে। বিদেশী পৰ্যটকৰ ভিতৰত আছে ২৩ জন বাংলাদেশী, ১০ জন আমেৰিকান আৰু ৩ জন ছিংগাপুৰৰ লোক।
পৰ্যটকৰ অন্যতম প্ৰিয় ঠাই ছিকিম। পাহাৰৰ সৌন্দৰ্য উপভোগ কৰিবলৈ ৰাজ্যখনলৈ বহু লোকে ভিৰ কৰে। এইবাৰ প্ৰকৃতিৰ ক্ৰোধৰ বাবে পৰ্যটকসকল বিপদত পৰে। উত্তৰ ছিকিমৰ বিভিন্ন পথত আবদ্ধ হৈ পৰে ৩৪৫খন গাড়ী আৰু ১১খন বাইক। প্ৰশাসনৰ সূত্ৰ মতে, বৰষুণ বন্ধ হোৱাৰ লগে লগে পথ মেৰামতিৰ কাম আৰম্ভ হʼব।
