প্ৰধানমন্ত্ৰী নৰেন্দ্ৰ মোদীৰ কাৰ্যকালৰ (Modi’s tenure) বিগত ১০ বছৰত কেন্দ্ৰীয় আৰু ৰাজ্যিক পৰ্যায়ৰ বিভিন্ন পৰীক্ষাত প্ৰশ্নকাকত ফাদিল (Question paper Leak) হোৱাৰ ১৫২টা ঘটনা সংঘটিত (152 incidents occurred) হৈছে। ফলত ৭.৫ কোটি পৰীক্ষাৰ্থী ক্ষতিগ্ৰস্ত হৈছে। কিন্তু এটা গোচৰতো কোনো শাস্তি বা দোষী সাব্যস্ত হোৱাৰ ঘটনা ঘটা নাই। এই অভিযোগ লোকসভাৰ বিৰোধী দলপতি ৰাহুল গান্ধীৰ (Rahul Gandhi) । বুধবাৰে নতুন দিল্লীৰ ৯এ কোটলা মাৰ্গত কংগ্ৰেছৰ মুখ্য কাৰ্যালয়ত অনুষ্ঠিত এক সংবাদমেলত এই অভিযোগ উত্থাপন কৰি তেওঁ কয়, “ভাৰতৰ শিক্ষা ব্যৱস্থা প্ৰৱঞ্চনাৰে ভৰা ব্যৱস্থাত পৰিণত হৈছে।”
বুধবাৰে ৰাহুল গান্ধীৰ সংবাদমেলৰ মূল বিষয় আছিল শেহতীয়াকৈ সংঘটিত প্ৰশ্নকাকত ফাদিলৰ দুৰ্নীতি আৰু নীট কেলেংকাৰীৰ বাবে দিল্লীত ছাত্ৰৰ প্ৰতিবাদী কাৰ্যসূচীক কেন্দ্ৰ কৰি সৃষ্টি হোৱা অশান্তি। কিন্তু তাৎপৰ্যপূৰ্ণ কথাটো হ’ল, যন্তৰ-মন্তৰৰ ধৰ্ণা আৰু সংসদ ভৱন অভিযানৰ মূল সংগঠক ‘ককৰোচ জনতা পাৰ্টী’ৰ (চিজেপি) নাম এবাৰো অহা নাই।
সংবাদমেলৰ আৰম্ভণিতে ৰাহুল গান্ধীয়ে বিৰোধী শিবিৰৰ তিনিটা দাবী উত্থাপন কৰে। নীট কেলেংকাৰীত কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানক লক্ষ্য কৰি তেওঁৰ পদত্যাগ, দিল্লীৰ ছাত্ৰ-ছাত্ৰী আৰু যুৱক-যুৱতীক আক্ৰমণৰ লগত জড়িতসকলক চিনাক্ত কৰি জবাবদিহি কৰা, প্ৰধানমন্ত্ৰী মোদীৰ ক্ষমাপ্ৰাৰ্থনা আদি তালিকাত আছে। ৰায়বেৰেলীৰ কংগ্ৰেছৰ সাংসদগৰাকীৰ মতে, “ছাত্ৰ-ছাত্ৰীসকল সন্ত্ৰাসবাদী নহয়। তেওঁলোকে নিজৰ অধিকাৰৰ বাবে শান্তিপূৰ্ণভাৱে প্ৰতিবাদ কৰিছে। তেওঁলোকৰ ওপৰত লাঠিচালনা কৰা, কন্দুৱা গেছ নিক্ষেপ কৰাটো সম্পূৰ্ণ অগণতান্ত্ৰিক আৰু অভাৰতীয় আচৰণ।”
দেশৰ শিক্ষা ব্যৱস্থা প্ৰৱঞ্চনামূলক হৈ পৰাৰ বাবে লাখ লাখ ছাত্ৰ-ছাত্ৰী আৰু তেওঁলোকৰ পৰিয়ালে মূল্য দিবলগীয়া হোৱাৰ অভিযোগ উত্থাপন কৰি ৰাহুল গান্ধীয়ে কয়, “মোদী চৰকাৰে ভাৰতৰ শিক্ষা ব্যৱস্থা সম্পূৰ্ণৰূপে ধ্বংস আৰু প্ৰৱঞ্চনামূলক কৰি তুলিছে। আৰ এছ এছে সমগ্ৰ শিক্ষা ব্যৱস্থাটো নিজৰ দখললৈ লৈছে আৰু শিক্ষানুষ্ঠানসমূহ চলাই আছে।” লোকসভাৰ বিৰোধী দলপতিগৰাকীৰ মতে, কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধান ‘সম্পূৰ্ণ অক্ষম আৰু অযোগ্য’ বুলি জানিব পৰা গৈছে। নীট প্ৰশ্নকাকত ফাদিলৰ বিৰুদ্ধে সংসদত চিজেপিৰ প্ৰতিবাদক লৈ সোমবাৰে দিল্লীত অশান্তিৰ সৃষ্টি হয়।
