মণিপুৰত অশান্তি (Unrest in Manipur) বন্ধ হʼবই যেন বিচৰা নাই। দেওবাৰে ৰাজ্যজুৰি উদযাপন কৰা হয় ‘একতা দিৱস’। ২০০১ চনৰ ১৮ জুনত মণিপুৰত সংঘটিত এক হিংসাত্মক ঘটনাত নিহতসকলক শ্ৰদ্ধাঞ্জলি জনোৱাৰ উদ্দেশ্যে প্ৰতিবছৰে এই দিৱস পালন কৰা হয়। কিন্তু দেওবাৰে নিশাও ৰাজ্যৰ বিভিন্ন প্ৰান্তত হিংসাত্মক পৰিস্থিতি বিয়পি পৰাৰ খবৰ আহিছে। অচিনাক্ত দুষ্কৃতিকাৰীৰ গুলীত আহত হয় এজন সেনা জোৱান (Army jawan injured in firing)। স্থানীয় সেনা চিকিৎসালয়ত ভৰ্তি কৰোৱা হয় তেওঁক।
ইয়াৰ উপৰি ইম্ফল পশ্চিম আৰু কাংপকপি জিলাৰ পৰা অশান্তিৰ নতুন খবৰ আহিছে।ইম্ফল পশ্চিম জিলাৰ চিংমাং গাঁৱৰ পৰা শনিবাৰ আৰু দেওবাৰে নিশা অধিকাংশ হিংসাত্মক ঘটনা সংঘটিত হয়। এই গাঁৱত টহল দি থকা অৱস্থাত এদল দুষ্কৃতিকাৰীয়ে আহত কৰে জোৱানজনক। লেইমাখঙৰ সেনা চিকিৎসালয়ত ভৰ্তি হোৱাৰ সময়ত চিকিৎসকে কয় যে বৰ্তমান তেওঁৰ শাৰীৰিক অৱস্থা সুস্থিৰ।
গাঁওখনৰ কমেও তিনিটা ঘৰতো দুষ্কৃতিকাৰীয়ে অগ্নিসংযোগ কৰে। সংবাদ সংস্থা পিটিআইৰ মতে, অগ্নিসংযোগৰ ঘটনা ৰোধ কৰিবলৈ গৈ আহত হয় জোৱানজন। এই খবৰটো নিশ্চিত কৰিছে সেনাবাহিনীৰ এক বিবৃতিত। খবৰ পোৱা গৈছে যে সেনাই গাঁওখনৰ পৰিস্থিতি নিয়ন্ত্ৰণ কৰিবলৈ সক্ষম হৈছে।
আনহাতে, কাংপকপি জিলাৰ এটা অঞ্চলত শনিবাৰ আৰু দেওবাৰে নিশা দুটা চৰকাৰী অনুষ্ঠানত অগ্নিসংযোগ কৰাৰ অভিযোগ উত্থাপন হৈছে কুকি উগ্ৰপন্থীৰ বিৰুদ্ধে। মণিপুৰ প্ৰশাসনৰ সূত্ৰ অনুসৰি, দেওবাৰে মাজনিশা হেংজাং গাঁৱত অজ্ঞাত দুষ্কৃতিকাৰীয়ে কুকিৰ ঘৰত অগ্নিসংযোগ কৰে। মণিপুৰত প্ৰায় ডেৰ মাহ ধৰি চলি থকা এই হিংসাত্মক ঘটনাত এতিয়ালৈকে ১০০ৰো অধিক লোকে প্ৰাণ হেৰুৱাইছে।
