দলিত যুৱতীক অপহৰণ, দলবদ্ধ ধৰ্ষণ (Gang rape) আৰু হত্যাৰ গোচৰত ৫জন লোকৰ বিৰুদ্ধে গোচৰ ৰুজু কৰা হৈছে। অভিযুক্তৰ ভিতৰত আছে দুজন আৰক্ষী জোৱান। তেওঁলোকক নিলম্বন কৰিছে কৰ্তৃপক্ষই।ৰাজস্থানৰ বিকানেৰত সংঘটিত হৈছে এই ঘটনা। ২০ বছৰীয়া যুৱতীগৰাকী ওচৰৰ এখন গাঁৱত বাস কৰিছিল। তেওঁ নিয়মিতভাৱে কোচিঙৰ উদ্দেশ্যে বিকানেৰৰ খাজুৱালা অঞ্চললৈ গৈছিল। সেই কোচিঙত পঢ়িবলৈ গৈয়ে তেওঁ বিপদত পৰে।
আৰক্ষীৰ মতে, এই ঘটনাৰ মূল অভিযুক্ত যুৱকজনক চিনাক্ত কৰা হৈছে। অভিযোগ অনুসৰি, বিগত ১৫ দিন ধৰি তেওঁ ছোৱালীজনীৰ ওপৰত চকু ৰাখিছিল। মঙলবাৰে পুৱা যুৱতীগৰাকী পঢ়িবলৈ যোৱাৰ সময়ত যুৱকজনো তালৈ যায়। তেওঁৰ লগত আছিল দুজন আৰক্ষী। খাজুৱালা থানাৰ কনিষ্টবল। অভিযোগ অনুসৰি, কোচিং চেণ্টাৰৰ পৰা তিনিজন লোকে যুৱতীগৰাকীক অপহৰণ কৰি লৈ যায়। ইয়াৰ পিছত তেওঁক যুৱকজনৰ ঘৰলৈ লৈ যোৱা হয়। তাতেই ছোৱালীজনীৰ দলবদ্ধ ধৰ্ষণ কৰা হয়। ধৰ্ষণৰ পিছত হত্যা কৰা হয় তেওঁক।
যুৱতীগৰাকীৰ পৰিয়ালৰ হৈ থানাত লিখিত এজাহাৰ দাখিল কৰা হৈছে। তেওঁৰ পিতৃয়ে জনোৱা মতে, সমগ্ৰ ঘটনাটো ঢাকি ৰাখিবলৈ অভিযুক্তই যুৱতীগৰাকীৰ মৃতদেহ খাজুৱালাৰ চিনেমা হলৰ সন্মুখত এৰি থৈ যায়। তিনিজনৰ বাহিৰেও আন দুজন যুৱক এই ঘটনাৰ সৈতে জড়িত বুলি মৃতকৰ পৰিয়ালে অভিযোগ কৰে।
অভিযুক্ত আৰক্ষী কনিষ্টবল দুজনক নিলম্বন কৰা হৈছে। অৱশ্যে এই পৰ্যন্ত কোনো লোকক গ্ৰেপ্তাৰ কৰা হোৱা নাই। মৃত যুৱতীগৰাকীৰ পৰিয়ালে মূল অভিযুক্ত আৰু অন্যান্য লোকক গ্ৰেপ্তাৰ কৰিবলৈ দাবী জনাইছে। সমগ্ৰ বিষয়টোৰ তদন্ত চলি থকা বুলি আৰক্ষীয়ে জানিবলৈ দিয়ে।
