বলীউডৰ জনপ্ৰিয় অভিনেতা সতীশ কৌশিকে (Actor Satish Kaushik) চলিত বৰ্ষৰ মাৰ্চ মাহত শেষ নিশ্বাস ত্যাগ কৰে। তেতিয়াৰে পৰা অনুপম খেৰে (Anupam Kher) অভিনেতাগৰাকীৰ পৰিয়ালৰ কাষত থিয় দিছে। কাৰণ চাৰি দশক ধৰি সতীশ আৰু অনুপমৰ বন্ধুত্ব অবিচ্ছেদ্য আছিল। সতীশৰ মৃত্যুত অনুপমো মানসিকভাবে ভাঙি পৰে। অনুপমে মাজে মাজে সতীশৰ কন্যা বংশিকাৰ (Satish’s daughter Bansika) সৈতে ছচিয়েল মিডিয়াত সময় কটোৱা দেখা যায়। এইবাৰ অনুপম খেৰে বলীউডত বন্ধুৰ কন্যাক সুযোগ দিয়াৰ কথা ঘোষণা কৰে।
অনুপমে মঙলবাৰে নিশা ছচিয়েল মিডিয়াত এটা ভিডিঅ’ পোষ্ট কৰে। সেই ভিডিঅʼটোত দেখা গৈছে যে বংশিকা অভিনেতাগৰাকীৰ অফিচলৈ আহিছে। এঘাৰ বছৰীয়া কিশোৰীজনীয়ে অনুপমৰ একাধিক প্ৰশ্নৰ উত্তৰ দি আছে। পিতৃয়ে কেনেকৈ তেওঁক সাধুকথা কৈ শুৱাইছিল, মাকৰ সৈতে ঘৰত সময় কটোৱাৰ পৰা আৰম্ভ কৰি টেইলৰ চুইফটৰ গীতলৈকে তেওঁ বহুতো কথা কোৱা শুনা যায়। এবাৰ অনুপমে বংশিকাক সোধে যে ভৱিষ্যতে অভিনেতা হʼব বিচাৰে নেকি।
বংশিকাই উত্তৰ দিয়ে যে তেওঁ অভিনয়ৰ বিষয়ে একো নাজানে। ইয়াৰ পিছত অনুপমে কয়, “তুমি যদি এদিন অভিনেত্ৰী হ’ব বিচাৰা, তেন্তে মই তোমাক কেৱল প্ৰশিক্ষণেই নহয়, চিনেমাত প্ৰথম সুযোগো দিম।” কিন্তু অনুপমে বন্ধুৰ জীয়াৰীক জনায় যে এতিয়া তেওঁৰ স্কুলীয়া বয়স। গতিকে সঠিক সময়ত যি কৰিব লাগে সেয়া কৰক। অনুপমে লগতে কয় যে অহা ১৫ জুলাইত বংশিকাৰ জন্মদিনত বিশেষ পাৰ্টিৰ আয়োজন কৰিব।
এই ভিডিঅ’টো ভাইৰেল হোৱাৰ লগে লগে নেটিজেনৰ এটা অংশই অনুপমক প্ৰশংসাৰে উপচাই দিয়ে। কোনোবাই লিখিছে, “কি ভাললগা পদক্ষেপ। সতীশ কৌশিকৰ ভাগ্য ভাল যে অনুপমৰ দৰে মানুহ এজনক বন্ধু হিচাপে পাইছে।” উল্লেখযোগ্য যে যোৱা ৯ মাৰ্চত হৃদৰোগত আক্ৰান্ত হৈ সতীশ কৌশিকৰ মৃত্যু হয়। অনুপমে প্ৰথমে ছচিয়েল মিডিয়াত অভিনেতা গৰাকীৰ মৃত্যুৰ খবৰ প্ৰকাশ কৰিছিল। অনুপম প্ৰিয় বন্ধুৰ অন্ত্যেষ্টিক্ৰিয়াতো উপস্থিত আছিল। বন্ধুৰ নিথৰ শৰীৰৰ কাষত বহি চকুপানী টুকিছিল। অনুপমে সতীশৰ বাবে মুম্বাইত স্মৃতিচাৰণ সভাৰো আয়োজন কৰে।
