মঙলবাৰে প্ৰধানমন্ত্ৰী নৰেন্দ্ৰ মোডী (Narendra Modi)য়ে ইউনিফৰ্ম চিভিল কোড (Uniform Civil Code) অৰ্থাৎ অভিন্ন দেৱানী বিধিক লৈ প্ৰশ্ন উত্থাপন কৰে। ইয়াৰ পিছতে মঙলবাৰে গভীৰ নিশা মুছলিম পাৰচনেল ল বোৰ্ডৰ (Muslim Personal Law Board) সদস্যসকলে জৰুৰী বৈঠক অনুষ্ঠিত কৰে।
ভাৰ্চুৱেল মাধ্যমৰ জৰিয়তে অনুষ্ঠিত বৈঠকত প্ৰস্তাৱিত আইনখনৰ সম্ভাৱনীয়তাৰ বিষয়ে আলোচনা কৰা হয়। ইয়াৰ পূৰ্বে কেন্দ্ৰীয় আইন আয়োগে ইউনিফৰ্ম চিভিল কোড সন্দৰ্ভত সকলো পক্ষৰ মতামত বিচাৰিছিল। মঙলবাৰৰ বৈঠকত সিদ্ধান্ত লোৱা হয় যে আইন বোৰ্ডে অধিবক্তাসকলৰ সৈতে কথা পতাৰ পিছত আইন আয়োগলৈ এখন খচৰা প্ৰস্তাৱ প্ৰেৰণ কৰিব।
ইতিমধ্যে লোকসভা নিৰ্বাচনৰ পূৰ্বে দেশত একেধৰণৰ দেৱানী বিধি প্ৰৱৰ্তনৰ বাবে সক্ৰিয় হৈছে কেন্দ্ৰৰ মোডী চৰকাৰে। কেন্দ্ৰই নিযুক্তি দিয়া আইন আয়োগেও এই ক্ষেত্ৰত ‘তৎপৰতা’ দেখুৱাইছে। এনে পৰিস্থিতিত মঙলবাৰৰ পৰাই প্ৰধানমন্ত্ৰী মোডীয়ে বিষয়টোৰ ওপৰত জনমত সৃষ্টিৰ কাম আৰম্ভ কৰে। মধ্যপ্ৰদেশৰ ভূপালত বিজেপিৰ বুথ কমিটীৰ সভাপতিসকলক দিয়া ‘মেৰা বুথ সবছে মজবুত’ কাৰ্যসূচীত তেওঁৰ প্ৰশ্ন- “যদি এটা পৰিয়ালত প্ৰতিজন সদস্যৰ বাবে সুকীয়া আইন থাকে, তেন্তে সেই পৰিয়ালটো চলিব পাৰিবনে?”
ইয়াৰ পিছত মোডীয়ে সেই যুক্তি ৰাষ্ট্ৰীয় প্ৰেক্ষাপটত দাঙি ধৰে। তেওঁ কয়, “দেশৰ প্ৰতিটো সম্প্ৰদায়ৰ বাবে যদি একক আইন থাকে, তেন্তে দেশখন আগবাঢ়িব নোৱাৰে। সংবিধানতো সকলোৰে বাবে সমান আইনৰ কথা কোৱা হৈছে। উচ্চতম ন্যায়ালয়েও ইউনিফৰ্ম চিভিল কোডৰ কথা কৈছে।” ৰাজনৈতিক বিশ্লেষকৰ এটা অংশৰ মতে, মঙলবাৰে প্ৰধানমন্ত্ৰীৰ ভাষণত স্পষ্ট হৈ পৰিছে যে ২০২৪ চনৰ নিৰ্বাচনৰ পূৰ্বে কেন্দ্ৰই ইউনিফৰ্ম চিভিল কোড প্ৰৱৰ্তন কৰিবলৈ আগ্ৰহী।
উল্লেখযোগ্য যে বিজেপি-আৰএছএছে ঘোষণা কৰা কাৰ্যসূচীৰ ভিতৰত অযোধ্যাৰ ৰাম মন্দিৰ, ৩৭০ ৰদ, CAA ৰূপায়ণ কৰিছে মোডী চৰকাৰে। ইউনিফৰ্ম চিভিল কোড এতিয়াও প্ৰৱৰ্তন কৰা হোৱা নাই। বিৰোধীৰ এটা অংশই অভিযোগ উত্থাপন কৰিছে যে বিজেপিয়ে পৰৱৰ্তী লোকসভা নিৰ্বাচনৰ পূৰ্বে ইয়াক ৰাজনীতিৰ ইছ্যু হিচাপে লʼবলৈ চেষ্টা কৰিছে। কাৰণ ইয়াৰ ফলস্বৰূপে মুছলমান সংগঠনসমূহে তেওঁলোকৰ মৌলিক অধিকাৰত হস্তক্ষেপ কৰা হৈছে বুলি আপত্তি কৰিব। বিৰোধী দলসমূহৰ মতে নিবনুৱা সমস্যা, মূল্যবৃদ্ধিৰ দৰে বিষয়সমূহ পিছুৱাই যাব আৰু মেৰুকৰণৰ ৰাজনীতি মূল বিষয় হৈ পৰিব।
