বলীউডৰ প্ৰবীণ অভিনেতা (Veteran Bollywood actor) হৰিশ মেগানৰ মৃত্যু (Actor Harish Megan passes away)। হৰিশে ‘গোল মাল’, ‘নমক হালাল’, ‘চুপকে চুপকে’ আদি ছবিত অভিনয় কৰি জনপ্ৰিয় হৈ উঠিছিল। মৃত্যুৰ সময়ত তেওঁৰ বয়স আছিল ৭৬ বছৰ।
দেওবাৰে টুইটাৰযোগে চিনে এণ্ড টিভি আৰ্টিষ্ট এছোচিয়েচনে হৰিশৰ মৃত্যুৰ খবৰ ঘোষণা কৰে। সংগঠনটোৱে টুইট কৰি কয়, “হৰিশ মেগানৰ বিয়োগত আমি দুঃখিত। ১৯৮৮ চনৰ পৰা তেওঁ আমাৰ সদস্য আছিল।” হৰিশৰ মৃত্যুৰ কাৰণ এতিয়াও জানিব পৰা হোৱা নাই। উদ্যোগটোৰ এটা মহলৰ অনুমান যে বাৰ্ধক্যজনিত ৰোগৰ বাবে হৰিশৰ মৃত্যু হৈছে। সূত্ৰৰ পৰা জানিব পৰা মতে, শনিবাৰে নিশা শেষ নিশ্বাস ত্যাগ কৰে অভিনেতাগৰাকীয়ে।
হিন্দী ছবি জগতখনত হৰিশৰ অভিনয় জীৱন প্ৰায় তিনি দশক ধৰি চলি আছিল। আগতে তেওঁ তুলনামূলকভাৱে সৰু সৰু চৰিত্ৰত অভিনয় কৰিছিল। গুলজাৰৰ সৈতে থকা সুসম্পৰ্কৰ বাবেই তেওঁ ‘আন্ধী’ ছবিখনতো সুযোগ পাইছিল। অৱশ্যে হৃষিকেশ মুখোপাধ্যায়ৰ ‘গোল মাল’ত তেওঁৰ অভিনয় আজিও দৰ্শকৰ মনত আছে।
অমিতাভ বচ্চন অভিনীত কেইবাখনো ছবিত হৰিশ আছিল। ইয়াৰ ভিতৰত উল্লেখযোগ্য হʼল ‘নমক হালাল’, ‘শ্বেহেনছা’, ‘আজুবা’, ‘সত্তে পে সত্তা’। ১৯৯৬ চনত মুক্তিলাভ কৰা হৰিশৰ কেৰিয়াৰৰ শেষৰখন ছবি ‘বম্বে কা বাবু’। এটিআইআইৰ প্ৰাক্তন ছাত্ৰ হৰিশে এসময়ত জুহুত অভিনয় প্ৰশিক্ষণ কেন্দ্ৰ আৰম্ভ কৰিছিল। হৰিশৰ মৃত্যুৰ কথা ছচিয়েল মিডিয়াত অভিনেতাগৰাকীৰ ঘনিষ্ঠ লোকে স্মৰণ কৰে।
