নোবেল বঁটা বিজয়ী অৰ্থনীতিবিদ অমৰ্ত্য সেনে (Economist Amartya Sen) দেশখনক হিন্দু ৰাষ্ট্ৰ হিচাপে গঢ়ি তোলাৰ পথ প্ৰশস্ত কৰিবলৈ ইউনিফৰ্ম চিভিল কোড (Uniform Civil Code) অৰ্থাৎ অভিন্ন দেৱানী বিধি আনিছে বুলি এক বিস্ফোৰক মন্তব্য কৰিছে।
আগন্তুক লোকসভা নিৰ্বাচনৰ পূৰ্বে ইউচিচি বা ইউনিফৰ্ম চিভিল কোডৰ ওপৰত বিজেপিৰ অতি সক্ৰিয়তাক লৈ ক্ষুব্ধ হৈ পৰিছে নোবেল বঁটা বিজয়ী অৰ্থনীতিবিদগৰাকী। অমৰ্ত্য সেনে কয়, “এয়া এক প্ৰৱঞ্চনাৰ বাহিৰে আন একো নহয়।” তেওঁৰ অভিযোগ যে এয়া বিজেপিৰ ভণ্ড নাটক (BJP’s hypocrite drama)। তেওঁলোকৰ প্ৰকৃত উদ্দেশ্য হিন্দু ৰাষ্ট্ৰ প্ৰতিষ্ঠা কৰা। অলপতে বিদেশৰ পৰা ভাৰতলৈ উভতি আহিছে অমৰ্ত্য সেন।
তাৰ পাছত পুনৰবাৰ এইগৰাকী নোবেল বঁটা বিজয়ীয়ে গেৰুৱা শিবিৰৰ ইউনিফৰ্ম চিভিল কোড বা এক দেশ, এক আইনৰ স্থিতিৰ বিৰুদ্ধে ক্ষোভিত প্ৰতিক্ৰিয়া প্ৰকাশ কৰে। তেওঁ কয়, “মই সংবাদ মাধ্যমত দেখি আছিলো যে একেধৰণৰ নাগৰিক নিয়ম কাৰ্যকৰী কৰাত কোনো ধৰণৰ পলম হʼব নালাগে। ক’ৰ পৰা আহিছে এই ধৰণৰ মূৰ্খৰ কথা? আমি হাজাৰ হাজাৰ বছৰ ধৰি একেধৰণৰ নাগৰিক সংহিতা অবিহনে কটালোঁ। ভৱিষ্যতেও ইয়াৰ অবিহনে যাবলৈ আমাৰ কোনো অসুবিধা নহʼব। দৰাচলতে এটা জটিল বিষয় যে অতি সহজ সেইটো দেখুৱাবলৈ চেষ্টা কৰা হৈছে।”
তেওঁৰ মতে, সেইটো হিন্দু ৰাষ্ট্ৰৰ সৈতে জড়িত হʼব লাগিব। অমৰ্ত্য সেনে কয়, “ইয়াত হিন্দু ধৰ্মৰ অপব্যৱহাৰৰ প্ৰয়াস কৰা হৈছে। হিন্দু ৰাষ্ট্ৰ যিয়েই নহওক এইটো আমাৰ আগুৱাই যোৱাৰ একমাত্ৰ পথ হʼব নোৱাৰে। হিন্দু ৰাষ্ট্ৰৰ পথত আগবাঢ়িলেও আমি যিখিনি অৰ্জন কৰি আছো তাৰ পৰা বহু কথা মচি পেলাব পাৰি।”
আগতেও এইগৰাকী নোবেল বঁটা বিজয়ী অৰ্থনীতিবিদে কেন্দ্ৰীয় চৰকাৰৰ কেইবাটাও নীতিৰ বিৰোধিতা কৰিছে। তেওঁৰ মতে, এখন দেশ, এখন আইন বুলি কʼলেই সকলো সমস্যা সমাধান নহয়। তেওঁ কয়, “আমি ভাবিব লাগিব কেনেকৈ এখন ৰাষ্ট্ৰ হোৱাটো সম্ভৱ। তাৰ বাবে প্ৰথমে আমাৰ মাজৰ বিভাজন হ্ৰাস কৰিব লাগিব।”
