অসমৰ মুখ্যমন্ত্ৰী ড° হিমন্ত বিশ্ব শৰ্মাই ( Himanta Biswa Sarma)চৰকাৰী বিদ্যালয়ৰ ছাত্ৰছাত্ৰী সকলক নবম শ্ৰেণীৰ পৰাই তেওঁলোকৰ লক্ষ্যৰ দিশত আগবঢ়াই নিয়াৰ বাবে আৰোহণ নামৰ এক আচঁনি গ্ৰহণ কৰিছে(AROHAN SCHEME ASSAM) ৷ চৰকাৰী বিদ্যালয় সমূহৰ অষ্টম শ্ৰেণীৰ পৰা নবম শ্ৰেণীলৈ বিদ্যালয়ৰ প্ৰথম হৈ উৰ্ত্তীণ হোৱা ছাত্ৰছাত্ৰী সকলক তেওঁলোকে ভবাৰ দৰেই জীৱনৰ পথত আগবাঢ়ি যাব পৰাকৈ উপযুক্ত পথৰ সন্ধান দিব এই আচঁনিয়ে ৷
এই আচঁনিৰ অধীনত আজি কাৰবি আংলং জিলা উপায়ুক্তৰ চৰকাৰী বাসভৱনৰ বাকৰিত জিলাখনৰ ৯২ খন বিদ্যালয়ৰ ৯২ গৰাকী ছাত্ৰছাত্ৰীৰ লগত মত বিনিময় আৰু পথৰ সন্ধান দিয়া হয় ৷ উপায়ুক্ত মধুমিতা ভাগৱতীয়ে অতি আন্তৰিকতাৰে বিদ্যালয়ৰ ছাত্ৰছাত্ৰী সকলৰ লগত মত বিনিময় কৰে ৷ এই অনুষ্ঠানত বিভিন্ন ক্ষেত্ৰৰ সমল ব্যক্তি হিচাবে উপস্থিত থাকে ন্যায়িক বিষয়া মানস প্ৰতীম ভূঞা , শিল্পী ৰাজীৱ ক্ৰ , বিদ্যালয় সমূহৰ পৰিদৰ্শক বীৰেণ ছ্ং ইংতি, লেখক-সাংবাদিক সঞ্জু বৰা , ডিফু মেডিকেল কলেজৰ সহকাৰী অধ্যাপক ডা অমল বৈশ্য , ডিফু চৰকাৰী কলেজৰ অধ্যাপক ড° সুৰঞ্জনা হাচনু আৰু জনস্বাস্থ্য কাৰিকৰী বিভাগৰ সহকাৰী অভিযন্তা সন্দীপ শইকীয়া ৷
উপায়ুক্ত ভাগৱতীয়ে সঞ্চালনা কৰা মত বিনিময় অনুষ্ঠানত ৯২ গৰাকী ছাত্ৰছাত্ৰীৰ ভিতৰত চাৰিগৰাকীয়ে আই এ এছ আৰু আই পি এছ , দুগৰাকীয়ে অভিনেতা-অভিনেত্ৰী , এগৰাকীয়ে সাংবাদিক , দুগৰাকীয়ে সংগীত শিল্পী , দুগৰাকীয়ে অভিযন্তা , দুগৰাকীয়ে আইনজীৱী আৰু আন সকলে চিকিৎসক , শিক্ষক , সেনা জোৱান-বিষয়া , নাৰ্চ হোৱাৰ নিজৰ আকাংক্ষাৰ কথা কয় ৷ সৰহ ভাগেই চিকিৎসক হোৱাৰ লক্ষ্য বুলি কয় ৷
ছাত্ৰছাত্ৰী সকলক সমল ব্যক্তি সকলে কেনেদৰে আৰু কি দৰে পঢ়াশুনা কৰিলে চিকিৎসক, প্ৰশাসনিক বিষয়া , অভিযন্তা , শিল্পী , সাংবাদিক , আইনজীৱী আদি হ’ব পাৰি তাৰ বিষয়ে কয় ৷ ছাত্ৰছাত্ৰী সকলৰ একোজনকৈ শিক্ষকক তেওঁলোকৰ গাইদ কৰি দিয়া হৈছে ৷ চাৰি বছৰলৈ এই ছাত্ৰছাত্ৰী সকলক চৰকাৰ আৰু এই শিক্ষক সকলে জীৱনৰ লক্ষ্যত উপনীত হোৱাৰ পথত কিদৰে আগবাঢ়ি যাব তাৰ পথ নিৰীক্ষণ কৰি উপদেশ দিব ৷
অতিৰিক্ত উপায়ুক্ত টিংকুমণি বৰা , অতিৰিক্ত সহকাৰী আয়ুক্ত আৰাধনা দাস , মমীনলা আওে আতঁ ধৰা অনুষ্ঠানৰ শেষত আৰোহণৰ সকলো ছাত্ৰছাত্ৰীক একোখনকৈ মূল্যবান গ্ৰন্থ , এখন প্ৰশস্তি পত্ৰ আৰু একোখনকৈ প’হ দি উপায়ুক্ত মধুমিতা ভাগৱতীয়ে তেওঁলোকৰ উজ্বল ভৱিষ্যতৰ শুভেচ্ছা দিয়ে ৷ ডিফু কলা কেন্দ্ৰৰ সংগীত শিল্পী প্লাবিতা বৰদলৈ আৰু সংগী বৃন্দৰ উপৰি সংগীতকে বৃত্তি ৰূপে বাছি লোৱা যুৱ শিল্পী ছাৰহন বেয়ে অনুষ্ঠানত গীত পৰিবেশন কৰি অনুষ্ঠানটো অধিক প্ৰাণবন্ত কৰি তুলে ৷
