ৰাজ্যিক শিশু সুৰক্ষা সমাজ বিভাগ আৰু মহিলা আৰু শিশু উন্নয়ন বিভাগৰ নিৰ্দেশ মৰ্মে ‘সুৰক্ষিত শৈশৱ আৰু সোণালী অসম’ক বিষয়বস্তু হিছাপে লৈ ৯০ দিনীয়া সজাগতা কাৰ্যসূচীৰ অংশ স্বৰূপে আজি বিয়লি ডিফুৰ ৰংখেলান বেলতলা পথ স্থিত জিলা শিশু সুৰক্ষা(Child Protection )গোটৰ কাৰ্যালয়ত শিশু সুৰক্ষা সন্দৰ্ভত সংবাদ মাধ্যমৰ ভূমিকাকলৈ এক সজাগতা সভা অনুষ্ঠিত হৈ যায় ৷
সংবাদ মাধ্যমৰ সৈতে অনুষ্ঠিত জিলা সুৰক্ষা গোটৰ সজাগতা সভাখনত সমল ব্যক্তি হিছাপে উপস্থিত থাকে চিডব্লিউচিৰ সদস্য বুলু তেৰাঙ আৰু জিলা প্ৰেছ ক্লাৱৰ কাৰ্যালয় সম্পাদক ছাইদুল ইছলাম লগতে কেইবীগৰাকী ডিজিটেল আৰু প্ৰিণ্ট মিডিয়াৰ সাংবাদিক সকল ৷ ইয়াৰোপৰি উক্ত সভাত ডিচিপিঅ’ বাচাপী তেৰাঙপী, আউট্ৰেছ ৱৰ্কাৰ্ছ মেৰিগল্ড ৰংপিপী, মিৰলিন তেৰাঙপী , সমাজ কৰ্মী দিপালী তিমুঙপী আৰু বাৰ্তাবাহক ক্লুংছাৰ ৰংহাঙ উপস্থিত থাকে ৷
ভাষণ প্ৰসংগত চি ডব্লিউ চিৰ সদস্য বুলু তেৰাঙে শিশু সুৰক্ষা আৰু শিশু অপৰাধ জনিত কাৰণত সাংবাদিক সকলে বাতৰি পৰিৱেশন কৰোতে যথেষ্ট সচেতনতা অৱলম্বন কৰিব লাগে বুলি কয় ৷ এনে ধৰণৰ বাতৰি সন্দৰ্ভত সম্ভৱ হলে চিডব্লিউচি আৰু আৰক্ষীক অৱগত কৰিহে বাতৰি পৰিৱেশন কৰিবলৈ পৰামৰ্শ আগবঢ়ায় ৷
এনে বাতৰি পৰিৱেশন কৰোতো আইনগত দিশ সমূহ ফঁহিয়াই চাইহে বাতৰি পৰিৱেশন কৰিব লাগে বুলি কয় ৷ কোনো কাৰণতে আইন ভংগ কৰিব নালাগে ৷ শিশু সুৰক্ষা সন্দৰ্ভত সাংবাদিকৰ ভূমিকা আৰু সাংবাদিকতাৰ নীতি আদৰ্শ, তথ্যগত আৰু আইনী জ্ঞানৰ ওপৰতো বিস্তৃতভাৱে আলোকপাত কৰে বুলু তেৰাঙে ৷
