আজিৰে পৰা গুৱাহাটীৰ কলাক্ষেত্ৰত (Kalakshetra in Guwahati) আৰম্ভ হৈছে নিৰ্বাচন আয়োগৰ সমষ্টি পুনৰ নিৰ্ধাৰণৰ ৰাজহুৱা শুনানি (Public hearing on Election Commission’s constituency rescheduling)। এই শুনানি অহা শুকুৰবাৰলৈকে চলিব।
ভাৰতৰ মুখ্য নিৰ্বাচন আয়ুক্ত ৰাজীৱ কুমাৰ আৰু নিৰ্বাচন আয়ুক্তদ্বয় অনুপ চন্দ্ৰ পাণ্ডে আৰু অৰুণ গোৱেলে এই শুনানি গ্ৰহণ কৰিছে। শংকৰদেৱ কলাক্ষেত্ৰৰ তিনিটা ভিন্ন প্ৰেক্ষাগৃহত বিভিন্ন ৰাজনৈতিক দল, সংগঠন, সামাজিক অনুষ্ঠান তথা নাগৰিক সমাজৰ পৰা সমষ্টি পুনৰ নিৰ্ধাৰণ সম্পৰ্কীয় ওজৰ-আপত্তি তথা যুক্তি শুনিব নিৰ্বাচন আয়োগে।
উল্লেখ্য, যোৱা মাহত সমষ্টি পুনৰ গঠন সন্দৰ্ভত প্ৰস্তাৱ প্ৰকাশ পোৱাৰ পিছৰ পৰা ১১ জুলাইলৈকে এই সন্দৰ্ভত বিভিন্ন দাবী আৰু পৰামৰ্শ আহ্বান কৰা হৈছিল। তাৰ ভিত্তিতে এই শুনানি আৰম্ভ হৈছে। এই সময়ছোৱাত ৭৮০ খনৰো অধিক আবেদন লাভ কৰে নিৰ্বাচন আয়োগে।উল্লেখযোগ্য যে অসমত অন্তিমবাৰৰ বাবে ১৯৭৬ চনত সমষ্টি পুনৰ নিৰ্ধাৰণ কৰা হৈছিল।
