‘সনাতন ধৰ্ম’ (Sanatana Dharma) সন্দৰ্ভত কৰা মন্তব্যৰ বিৰোধিতা কৰি কেন্দ্ৰীয় মন্ত্ৰী তথা বিজেপি নেতা গজেন্দ্ৰ সিং শ্বেখাৱাটে (Gajendra Singh Shekhawat) চৰম সকীয়নি প্ৰদান কৰিছে। অভিযোগ অনুসৰি, ৰাজস্থানৰ বাৰ্মেৰত বিজেপিৰ প্ৰব্যন যাত্ৰাত ভাষণ দি তেওঁ কয়, “সনাতন ধৰ্মৰ বিৰোধিতা কৰাসকলৰ জিভা উলিয়াই আনি কাটি পেলোৱা হʼব। চকু উলিয়াই আনিম।” গজেন্দ্ৰৰ মন্তব্যৰ এটা ভিডিঅʼ ইতিমধ্যে ছচিয়েল মিডিয়াত ভাইৰেল হৈছে।
ইতিমধ্যে তামিলনাডুৰ মুখ্যমন্ত্ৰী তথা ডিএমকেৰ মুৰব্বী এমকে ষ্টেলিনৰ পুত্ৰ উদয়নিধিৰ বিৰুদ্ধে সনাতন ধৰ্মক অপমান কৰাৰ অভিযোগ উত্থাপন কৰিছে বিজেপি আৰু বিভিন্ন হিন্দুত্ববাদী সংগঠনে। উদয়নিধিক চৰ মাৰিলে ১০ লাখ টকাৰ পুৰস্কাৰ দিয়া হʼব বুলিও পোষ্টাৰত লিখা হৈছে। এই পৰিস্থিতিত গজেন্দ্ৰৰ দৰে এজন প্ৰভাৱশালী কেন্দ্ৰীয় মন্ত্ৰীৰ মন্তব্যই সমগ্ৰ বিষয়টোক ‘আন এক মাত্ৰা’ প্ৰদান কৰা বুলি ধাৰণা কৰা হৈছে।
উল্লেখযোগ্য যে যোৱা ৯ ছেপ্টেম্বৰত চেন্নাইত অনুষ্ঠিত এক সাহিত্যিক অনুষ্ঠানত ষ্টেলিনৰ কেবিনেট সদস্য তথা জনপ্ৰিয় তামিল অভিনেতা উদয়নিধিয়ে কৈছিল- “সনাতন ধৰ্মৰ আদৰ্শ মচি পেলাবলৈ মোক এই অনুষ্ঠানলৈ আমন্ত্ৰণ জনোৱাৰ বাবে আয়োজকসকলক ধন্যবাদ জনাইছো।” তাৰ পিছত তেওঁ কয়, “আমাৰ প্ৰথম কাম বিৰোধিতা নহয়, সনাতন ধৰ্মৰ আদৰ্শ মচি পেলোৱা। এই পৰম্পৰা সামাজিক ন্যায় আৰু সমতাৰ বিৰোধী।” অভিযোগ অনুসৰি, অনুষ্ঠানত উদয়নিধিয়ে কয় যে কিছুমান কথা আছে, যিবোৰৰ বিৰোধিতাই যথেষ্ট নহয়, সেইবোৰ নিৰ্মূল কৰাটো প্ৰয়োজন। কৰোনা, মেলেৰিয়া, ডেংগুৰ যেনেকৈ বিৰোধিতা কৰা নহয়, সেইবোৰ নিৰ্মূল কৰাটো প্ৰয়োজন, পৰম্পৰাগত আদৰ্শবোৰো নিৰ্মূল কৰাটো প্ৰয়োজন।
তৃণমূল নেত্ৰী মমতা বেনাৰ্জী, কংগ্ৰেছ নেতা কমল নাথ, শিৱসেনাৰ নেতা সঞ্জয় ৰাৱটে ইতিমধ্যে উদয়নিধিৰ এই বক্তব্যক সমৰ্থন নকৰা বুলি উল্লেখ কৰিছে। ষ্টেলিন-পুত্ৰয়ো ৰাজহুৱাভাৱে কয় যে কোনো ধৰ্মক আঘাত কৰাটো তেওঁৰ উদ্দেশ্য নাছিল। ৰাজনৈতিক উদ্দেশ্যত তেওঁৰ ভাষণৰ ভুল ব্যাখ্যা কৰা হৈছে। কিন্তু লোকসভা নিৰ্বাচনৰ পূৰ্বে এই বিষয়টো ৰাজনৈতিক প্ৰচাৰত আনিবলৈ আগ্ৰহী বিজেপি।
সমগ্ৰ বিষয়টো হিন্দু ধৰ্মৰ ওপৰত আক্ৰমণ বুলি অভিযোগ কৰি তেওঁলোকে অভিযান চলাইছে। কেন্দ্ৰীয় গৃহমন্ত্ৰী অমিত শ্বাহে পোনপটীয়াকৈ ‘ইণ্ডিয়া’ক হিন্দু বিৰোধী বুলি ব্ৰেণ্ড কৰে। বুধবাৰে কেন্দ্ৰীয় কেবিনেট বৈঠকত প্ৰধানমন্ত্ৰী নৰেন্দ্ৰ মোডীয়েও উদয়নিধিৰ নাম উল্লেখ নকৰাকৈ লক্ষ্য কৰি লয়।
