বিহাৰত সংঘটিত হৈছে এক ভয়ানক নাও দুৰ্ঘটনা (Boat accident in Bihar)। ৩০ গৰাকী স্কুলীয়া ছাত্ৰ-ছাত্ৰীক কঢ়িয়াই নিয়া এখন যাত্ৰীবাহী নাও নদীত ডুব যায় (Boats carrying school children drown in the river)। অৱশ্যে ২০টা শিশুক উদ্ধাৰ কৰা হৈছে যদিও ১০টা শিশু এতিয়াও সন্ধানহীন (10 children still missing) হৈ আছে। বৃহস্পতিবাৰে পুৱা বিহাৰৰ মুজাফ্ফৰপুৰত সংঘটিত হয় এই ঘটনা।
স্থানীয় প্ৰশাসনৰ সূত্ৰ অনুসৰি, শিশুসহ বাগমতী নদী পাৰ হৈ গৈ আছিল এখন নাও। নদীৰ মাজভাগ পোৱাৰ লগে লগে নাওখন ওলটি পৰে। স্থানীয় ৰাইজে প্ৰথমে শিশুকেইটাক বচাবলৈ লৰালৰি কৰে। তেওঁলোকৰ সহায়ত ২০টা শিশুক উদ্ধাৰ কৰা হয় যদিও বাকীকেইটা শিশুৰ কোনো সন্ধান পোৱা নাই।
উদ্ধাৰ অভিযানৰ বাবে আহ্বান জনাইছে ৰাজ্যিক দুৰ্যোগ সঁহাৰি বাহিনীক। নিৰুদ্দেশ হোৱা শিশুকেইটাৰ সন্ধানত অভিযান অব্যাহত ৰাখিছে এছডিআৰএফৰ জোৱানসকলে। আৰক্ষীয়ে জানিবলৈ দিয়া মতে, ডুবাৰু আনি অনুসন্ধান অভিযান চলোৱা হৈছে।
আৰক্ষীয়ে জনোৱা মতে, পুৱা প্ৰায় ৯.৩০ বজাত ৩০ জনতকৈ অধিক স্কুলীয়া ছাত্ৰ-ছাত্ৰীক লৈ এখন নাও নদীখন পাৰ হৈ আছিল। স্কুলখন নদীৰ সিপাৰে। ছাত্ৰ-ছাত্ৰীসকলে প্ৰতিদিনে নাৱেৰে যাত্ৰা কৰিবলগা হয়। প্ৰত্যক্ষদৰ্শীয়ে জনোৱা মতে, বৃহস্পতিবাৰে নদীখনৰ পানীৰ সোঁত বৃদ্ধি হোৱাৰ বাবে নাৱিকজনে নিয়ন্ত্ৰণ হেৰুৱাই পেলায়। ফলত বিদ্যালয়ৰ ছাত্ৰ-ছাত্ৰী কঢ়িয়াই নিয়া নাওখন নদীৰ মাজতে বাগৰি পৰে। এই ঘটনাৰ খবৰ পোৱাৰ পিছত মুখ্যমন্ত্ৰী নীতিশ কুমাৰে মুজাফ্ফৰপুৰ জিলা প্ৰশাসনক সম্ভৱপৰ সকলো প্ৰকাৰে সহযোগিতা আগবঢ়াবলৈ নিৰ্দেশ দিয়ে।
