ASSAM TIMES POST
নিউজ ডেস্ক
ঝাৰখণ্ড মচনদৰ পথ প্ৰশস্ত হেমন্ত চোৰেণৰ বাবে৷ এতিয়া ঝাৰখণ্ড মুক্তি মৰ্চা, কংগ্ৰেছ আৰু ৰাষ্ট্ৰীয় জনতা দলৰ মিত্ৰজোঁটৰ চৰকাৰ গঠনৰ প্ৰস্তুতি তুংগত৷ মুখ্য মন্ত্ৰীৰ দাবীদাৰক লৈ কোনো মতানৈক্য নাই৷ প্ৰাথমিকভাৱে মন্ত্ৰীসভাৰ ৰূপৰেখাও তৈয়াৰ কৰি তুলিছে মিত্ৰজোঁটৰ নেতাসকলে৷ জেএমএম তথা ৰাঁচীৰ ৰাজভৱনৰ এক সূত্ৰমতে, অহা ২৭ ডিচেম্বৰত মুখ্য মন্ত্ৰী হিচাপে শপতগ্ৰহণৰ সম্ভাৱনা আছে হেমন্ত চোৰেণৰ৷
অৱশ্যে সোমবাৰে দুপৰীয়া পৰ্যন্ত বিজেপিয়ে আশাপালি আছিল ফলাফল ত্ৰিশংকু হ’ব পাৰে বুলি৷ কিন্তু দিন যিমানে বাগৰিল সিমানে পাল্লা গধুৰ হ’ল জেএমএম-কংগ্ৰেছ-আৰজেডি মিত্ৰজোঁটৰ৷ ৮১খন আসনৰ ঝাৰখণ্ড বিধানসভাত শেষ পৰ্যন্ত এই মিত্ৰজোঁটৰ দখললৈ যায় ৪৭খন আসন৷ ইয়াৰ ভিতৰত জেএমএমে ৩০খন, কংগ্ৰেছে ১৬খন আৰু আৰজেডিয়ে এখন আসন লাভ কৰে৷ ফলত অনায়াসে লাভ কৰে ‘মেজিক ফিগাৰ’ ৪১৷ লগে লগে পৰিষ্কাৰ হয় চৰকাৰ গঠনৰ পথ৷
ইফালে মন্ত্ৰীসভা গঠনৰ চূড়ান্ত সিদ্ধান্তৰ বাবে মঙলবাৰে ৰাঁচীত শিবু পুত্ৰ হেমন্তই আহ্বান কৰিছে বিধায়িনী দলৰ বৈঠক৷ উক্ত বৈঠকত উপস্থিত ঝাৰখণ্ডৰ তিনিবাৰৰ মুখ্য মন্ত্ৰী তথা হেমন্ত চোৰেণৰ পিতা শিবু চোৰেণ৷ জেএমএম সূত্ৰমতে, উক্ত বৈঠকতে হেমন্ত চোৰেণক বিধায়িনী দলৰ নেতা হিচাপে নিৰ্বাচিত কৰিব বিধায়কসকলে৷ তাৰ পিছতে মঙলবাৰ অথবা বুধবাৰে ৰাজভৱনলৈ গৈ ৰাজ্যপালৰ ওচৰত চৰকাৰ গঠনৰ বাবে দাবী জনাব হেমন্ত চোৰেণে৷ অহা ২৭ ডিচেম্বৰত অনুষ্ঠিত হ’ব পাৰে শপতগ্ৰহণ৷
আনহাতে, মন্ত্ৰীসভাৰ ৰূপৰেখাৰ পূৰ্বানুমান মতে, মুখ্য মন্ত্ৰীসহ ৬টা দপ্তৰ থাকিব জেএমএমৰ হাতত৷ কংগ্ৰেছৰ হাতত থাকিব পাৰে বিধানসভাৰ অধ্যক্ষসহ ৫টা দপ্তৰ৷ অৱশ্যে এটা দপ্তৰ দিব পাৰে লালুপ্ৰসাদ যাদৱৰ আৰজেডে দলক৷
