মুখ্যমন্ত্ৰী হিমন্ত বিশ্ব শৰ্মাৰ (Himanta Biswa Sarma) বিৰুদ্ধে উত্থাপিত গোচৰ খাৰিজ উচ্চতম ন্যায়ালয়ৰ। উচ্চতম ন্যায়ালয়ৰ মুখ্য ন্যায়াধীশ সূৰ্য কান্তৰ বিচাৰপীঠে প্ৰশ্ন উত্থাপন কৰে যে কিয় আবেদনকাৰীসকলে উচ্চ ন্যায়ালয়ৰ কাষ চপা নাই। এই গোচৰৰ সৈতে জড়িত সকলো পক্ষকে সংযম আৰু সাংবিধানিক নৈতিকতাৰ পৰিসীমাৰ ভিতৰত থাকিবলৈ কয় শীৰ্ষ আদালতে।
আবেদনকাৰীয়ে ইচ্ছা কৰিলে গুৱাহাটী উচ্চ ন্যায়ালয়ৰ কাষ চাপিব পাৰে বুলিও উচ্চতম ন্যায়ালয়ে প্ৰকাশ কৰিছে। যোৱা সপ্তাহত গোচৰটো লোৱাৰ সময়ত মুখ্য ন্যায়াধীশৰ বিচাৰপীঠে উচ্চতম ন্যায়ালয়ক নিৰ্বাচনী প্ৰচাৰ হিচাপে গ্ৰহণ কৰা বুলি কৈছিল। উচ্চতম ন্যায়ালয়ে এই ধাৰাক সমস্যা বুলিও অভিহিত কৰিছিল।
সোমবাৰে গোচৰ খাৰিজ কৰাৰ সময়ত আদালতে পুনৰ এই বিষয়টো উল্লেখ কৰে। মুখ্য ন্যায়াধীশৰ বিচাৰপীঠে আবেদনকাৰীসকলক প্ৰশ্ন কৰে , “আপোনালোকে গুৱাহাটী উচ্চ ন্যায়ালয়লৈ কিয় যোৱা নাই? ইয়াৰ (উচ্চ ন্যায়ালয়ৰ) ক্ষমতাৰ ভুল মূল্যায়ন নকৰিব। আমি সকলোকে সংযম ৰক্ষা কৰি সাংবিধানিক নৈতিকতাৰ পৰিসীমাৰ ভিতৰত থাকিবলৈ ক’ম। কিন্তু নিৰ্বাচনৰ ঠিক আগতে এইটো এটা ধাৰা হৈ পৰিছে।”
সোমবাৰে মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচী আৰু ন্যায়াধীশ বিপুল এম পাঞ্চোলিৰ বিচাৰপীঠৰ সন্মুখত এই গোচৰটো উত্থাপন হয়। কিন্তু মুখ্য ন্যায়াধীশৰ বিচাৰপীঠে আবেদনকাৰীসকলক প্ৰথমে উচ্চ ন্যায়ালয়ৰ কাষ চাপিবলৈ পৰামৰ্শ দিয়ে। একে সময়তে আদালতে গুৱাহাটী উচ্চ ন্যায়ালয়ৰ মুখ্য ন্যায়াধীশক গোচৰৰ ক্ষিপ্ৰ শুনানিৰ ব্যৱস্থা কৰিবলৈও পৰামৰ্শ দিয়ে।
উল্লেখযোগ্য যে শেহতীয়াকৈ অসমৰ মুখ্যমন্ত্ৰী হিমন্ত বিশ্ব শৰ্মাৰ এটা ভিডিঅ’ ছ’চিয়েল মিডিয়াত ভাইৰেল হৈছিল। অসম বিজেপিৰ ছ’চিয়েল মিডিয়া হেণ্ডেলৰ পৰা পোষ্ট কৰা এই ভিডিঅ’টোক লৈ বিতৰ্কৰ সৃষ্টি হয়।
সম্পাদিত ভিডিঅ’টোক লৈ বিতৰ্ক আৰম্ভ হোৱাৰ পিছত বিজেপিয়ে অৱশ্যে ছ’চিয়েল মিডিয়াৰ পৰা এই ভিডিঅ’টো ডিলিট কৰে। কিন্তু তাতো বিতৰ্কৰ অন্ত নপৰিল। ইতিমধ্যে এই সন্দৰ্ভত উচ্চতম ন্যায়ালয়ত গোচৰ ৰুজু কৰা হৈছে।
জনস্বাৰ্থৰ গোচৰ দাখিল কৰা হয়। লগতে মুখ্যমন্ত্ৰীৰ বিৰুদ্ধে উচ্চতম ন্যায়ালয়ৰ কাষ চাপে কেইবাজনো বাওঁপন্থী নেতাই। উচ্চতম ন্যায়ালয়ে শুনানিৰ প্ৰথমদিনাই হিমন্ত বিশ্ব শৰ্মাৰ বিৰুদ্ধে গোচৰ খাৰিজ কৰে।
