অসম-নাগালেণ্ড সীমান্তৰ(Assam -Nagaland Border) ডিলাইত আজি ৩৬ ৰাষ্ট্ৰীয় ঘাই পথত চলোৱা নাকা তালাচীত বৃহৎ পৰিমানৰ সন্দেহজনক হেৰইন সহ দুজন ব্যক্তিক আটক কৰাৰ লগতে এখন মাৰুতি চুজুকি ইক’ বাহন জব্দ কৰিবলৈ সক্ষম হয় ৷ অসম-নাগালেণ্ড সীমান্তৰ ডিলাইত আৰক্ষীৰ চকুত ধুলি দি এখন বাহনত গোপন চেম্বাৰ সাজি সন্দেহযুক্ত হেৰইনখিনি সৰবৰাহ কৰিবলৈ অপচেষ্টা কৰাৰ সময়ত আৰক্ষীৰ জালত পৰে দুটাকৈ মণিপুৰী সৰবৰাহকাৰী ৷
প্ৰাপ্ত খবৰ অনুসৰি আজি বিয়লি প্ৰায় ৪ বাজি ৪৬ মিনিটত মণিপুৰৰ দিশৰ পৰা কাৰবি আংলঙৰ মাঞ্জাৰ অভিমুখে আহি থকা এম এন ০৬ এল এক্স ১৮৪৮ বাহনখনত তালাচী চলাই বাহনখনৰ গোপন চেম্বাৰত মুঠ ২২ টা চাবোনৰ বাকচত লুকুৱাই অনা অৱস্থাত ২৬৯’৪৩ গ্ৰাম হেৰইন উদ্ধাৰ কৰে ৷
ডিলাই আৰক্ষীয়ে ড্ৰাগছ সৰবৰাহকাৰী মণিপুৰৰ থৌবাল জিলাৰ মহম্মদ আব্দুল হামিদৰ পুত্ৰ মহম্মদ ছাহিব আৰু একে জিলাৰ মেৰিমিয়াম আয়াজুদ্দিনৰ পুত্ৰ মেৰিমিয়াম আৰিচক গ্ৰেপ্তাৰ কৰে ৷ উদ্ধাৰ হোৱা সন্দেহযুক্ত হেৰ’ইনখিনি নিৰপেক্ষ সাক্ষী গণৰ সাক্ষাতে জব্দ কৰি এই সন্দৰ্ভত এনডিপিএছ এক্টত এক গোছৰ ৰুজো দি তদন্ত অব্যাহত ৰখা হৈছে বুলি জানিব পৰা গৈছে ৷
