
২০২৪ চনত কাৰ্বি যুৱ মহোৎসৱৰ সোণালী জয়ন্তী উপলক্ষে আয়োজন কৰা হৈছিল বিশ্বৰ সৰ্ববৃহৎ ‘ৰণপা খোজ’। ৭২১ গৰাকী ৰণপা শিল্পীৰ নিপুণ প্ৰচেষ্টাৰ ফলস্বৰূপে কাৰ্বি আংলঙৰ নাম অন্তৰ্ভুক্ত হৈছিল গীনিজ বুক অৱ ৱৰ্ল্ড ৰেকৰ্ডত। এইবাৰো ইতিহাসৰ সাক্ষী হৈ ৰ’ল কাৰ্বি আংলংবাসী।

পাৰ্বত্য জিলাখনৰ ১৭টা জনগোষ্ঠীৰ ১৫ হাজাৰ শিল্পীয়ে একেলগে কাৰ্বিসকলৰ পৰম্পৰাগত ‘নিমছ কেৰুঙ’ নৃত্যৰ তালে তালে নৃত্য প্ৰদৰ্শন কৰি অন্ধ্ৰপ্ৰদেশৰ ১৩ হাজাৰ শিল্পীৰ একেলগে লোকনৃত্য প্ৰদৰ্শনৰ অভিলেখ ভংগ কৰি গীনিজ বুক অৱ ৱৰ্ল্ড ৰেকৰ্ডত কাৰ্বি আংলং জিলাৰ নাম অন্তৰ্ভুক্ত কৰিবলৈ সক্ষম হয়।
কাৰ্বি আংলং দিৱসৰ ৭৫সংখ্যক বৰ্ষপূৰ্তি উপলক্ষে এই অভিলেখ গঢ়াৰ লক্ষ্যৰে যোৱা দুদিন-তিনিদিন ধৰি আৰু আজি দিনজোৰা আখৰাৰ অন্তত ডিফুৰ কাছা ষ্টেডিয়ামত সন্ধিয়া ৭ বজাত মূল কাৰ্যসূচীত অৱতীৰ্ণ হয় ১৫ হাজাৰ শিল্পী। কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তথা বিধায়ক তুলিৰাম ৰংহাং, পৰিষদৰ কাৰ্যবাহী সদস্যসকল আৰু এমএচিসকল, পাৰ্বত্য জিলাখনৰ বিধায়কসকলৰ লগতে গীনিজ বুক অৱ ৱৰ্ল্ড ৰেকৰ্ডৰ নজনীয়া প্ৰতিনিধি দলৰ উপস্থিতিত শিল্পীসকলে নিজৰ প্ৰতিভা প্ৰদৰ্শন কৰে।
কেইবাবাৰো টেক আৰু ৰিটেকৰ অন্তত অৱশেষত নিশা প্ৰায় ৮ বজাত আহিল বহু প্ৰত্যাশিত সেই ক্ষণ। শিল্পীসকল সফল হ’ল আৰু গীনিজ বুক অৱ ৱৰ্ল্ড ৰেকৰ্ডৰ প্ৰতিনিধিসকলে সেউজ সংকেত প্ৰদান কৰি ১৫ হাজাৰ শিল্পীৰ সফলতাৰ কথা ঘোষণা কৰে। সৰ্বাধিক জনজাতীয় শিল্পীৰ একেলগে নৃত্য প্ৰদৰ্শনৰ অভিলেখেৰে গীনিজ বুকত অন্তৰ্ভুক্ত হ’ল কাৰ্বি আংলঙৰ নাম। গীনিজ বুক অৱ ৱৰ্ল্ড ৰেকৰ্ডৰ বিষয়াসকলে এই ঘোষণা কৰাৰ লগে লগে উল্লাসত ফাটি পৰে সমগ্ৰ কাছা ষ্টেডিয়াম।
এই ঘোষণাৰ পিছতে মঞ্চত থিয় হৈ মুখ্য কাৰ্যবাহী সদস্য তুলিৰাম ৰংহাঙে কয় যে, আমাৰ সপোন সাৰ্থক হ’ল। এয়া ১৫ হাজাৰ শিল্পীৰ কৃতিত্ব। তেওঁ লগতে জানিবলৈ দিয়ে যে কাইলৈ মুখ্যমন্ত্ৰীৰ উপস্থিতিত কাৰ্বি আংলং দিৱসৰ মূল অনুষ্ঠানত গীনিজ বুক অৱ ৱৰ্ল্ড ৰেকৰ্ডৰ প্ৰতিনিধিসকলে আনুষ্ঠানিকভাৱে এই সন্মান প্ৰদান কৰিব।উল্লেখ্য যে দিনজোৰা কাৰ্যসূচীৰ ধকল সহ্য কৰিব নোৱাৰি কেইবাগৰাকীও শিল্পী অসুস্থ হৈ পৰে আৰু তেওঁলোকক চিকিৎসালয়লৈ লৈ যোৱা হয়।












