ASSAM TIMES POST
নিউজ ডেস্ক
প্ৰথমেতে সংশোধিত নাগৰিকত্ব আইন আৰু ৰাষ্ট্ৰীয় নাগৰিকপঞ্জীৰ বিৰোধিতা৷ এইবাৰ বিহাৰত বিজেপিৰ সৈতে নীতিশ কুমাৰ চৰকাৰৰ নতুন সমীকৰণ তৈয়াৰ হোৱা উচিত বুলি পৰামশৰ্শ দিছে নিৰ্বাচন বিশেষজ্ঞ তথা কাগজে-কলমে জনতা দল (ইউ)ৰ ‘ছেকেণ্ড-ইন-কমাণ্ড’ প্ৰশান্ত কিশোৰে৷ তেওঁৰ মতে, দুই দলৰ ভিতৰত ইমান দিনে ৫০:৫০ সমীকৰণ মানি আসনৰ ভাগবতৰা কৰা হ’লেও আগন্তুক বিধানসভা নিৰ্বাচনত সিংহভাগ আসনত জেডিইউ-এ প্ৰাৰ্থী থিয় কৰোৱা উচিত৷
উল্লেখ্য যে চিএএ আৰু এনআৰচিৰ বিৰুদ্ধে প্ৰশান্ত কিশোৰ সৰৱ হ’লেও এতিয়া পৰ্যন্ত প্ৰকাশ্যে ইয়াক লৈ কোনো মন্তব্য কৰা নাই বিহাৰৰ মুখ্য মন্ত্ৰী নীতিশ কুমাৰে৷ তাৎপৰ্যপূৰ্ণভাৱে মিত্ৰজোঁটৰ সহযোগী দলৰ বিৰুদ্ধে মুখ খোলাৰ পিছতো প্ৰশান্ত কিশোৰৰ বিৰুদ্ধে কোনো পদক্ষেপো গ্ৰহণ কৰা নাই তেওঁ৷
ৰাজনৈতিক বিশেষজ্ঞসকলৰ ধাৰণা, আগন্তুক বিধানসভা নিৰ্বাচনক লৈ বিজেপিৰ লগত আসন বুজাবুজিৰ চূড়ান্ত সিদ্ধান্ত নোহোৱাৰ বাবেই এতিয়াও নিস্চুপ হৈ আছে নীতিশ কুমাৰ৷ তাকে লৈ প্ৰশ্ন কৰাত প্ৰশান্ত কিশোৰে সংবাদ মাধ্যমৰ আগত কয়, “মই মাত্ৰ এইটো জানো যে আসন বিতৰণ ১:১:৪ অনুপাতত (অৰ্থাৎ বিজেপিক ৫খন আসন এৰি দিলে জেডেইউ-এ ৭খন আসন পোৱা উচিত) হোৱা উচিত৷
উল্লেখ্য যে শিৱসেনাৰ সৈতে মুখ্য মন্ত্ৰীৰ পদক লৈ মতবিৰোধৰ বাবেই চলিত বছৰৰ শেষৰ ভাগত মহাৰাষ্ট্ৰ ওলাই যায় বিজেপিৰ হাতৰ পৰা৷ সেয়েহে প্ৰশান্ত কিশোৰৰ এই মন্তব্যক লৈও নানা জল্পনা-কল্পনা আৰম্ভ হৈছে ৰাজনৈতিক মহলত৷ অৱশ্যে প্ৰশান্ত কিশোৰৰ এই মন্তব্যত একো নাহে বা নাযায় বুলি প্ৰতিক্ৰিয়া প্ৰকাশ কৰিছে বিজেপিৰ নেতা নীতিন নবীনে৷ তেওঁ কয়, “দুয়ো দলৰ হাইকমাণ্ডে আসনৰ বুজাবুজিক লৈ চূড়ান্ত সিদ্ধান্ত গ্ৰহণ কৰিব৷ ইয়াকে লৈ প্ৰশান্ত কিশোৰে মূৰ ঘমাইছে কিয়, তাকহে মই বুজি পোৱা নাই৷”
