ASSAM TIMES POST
বিশেষ প্ৰতিবেদন
অভিনয়ৰ পথাৰত এইবাৰ নাছিল দীপিকা পাডুকন বা অনুষ্কা শৰ্মা৷ ‘গাল্লি বয়’-এ অস্কাৰৰ দৌৰত আমাৰ দেশৰ পৰা এণ্ট্ৰি পালেও, সেইখন আলিয়া ভাটৰ ছবি বুলি সম্পূৰ্ণভাৱে ক’ব পৰা নাযায়৷ প্ৰায় তিনি বছৰ পিছত হিন্দী ছবি জগতলৈ উভতি আহে প্ৰিয়ংকা চোপ্ৰা ‘দ্য স্কাই ইজ পিংক’ ছবিৰ জৰিয়তে৷ কংগনা ৰাণাৱাটে ‘মণিকৰ্ণিকা : দ্য কুইন অব্ ঝান্সি’ত যিমান গৰজিলে, পিছে সিমান নবৰষিল বক্স অফিচত৷ তেতিয়াহ’লে কি ২০১৯ বৰ্ষটো বলীউডৰ অভিনেত্ৰীসকলৰ বাবে মন্দা বৰ্ষ আছিল নেকি?
নিশ্চয় নহয়৷ ২০১৯ত হিন্দী ছবি উদ্যোগত প্ৰতিষ্ঠিত নায়িকাসকলৰ বিপৰীতে নতুন মুখেহে প্ৰভাৱ বিস্তাৰ কৰিবলৈ সক্ষম হয়৷ বৰ্ষটোৰ দৌৰত আগুৱাই থাকে কিছু অপ্ৰত্যাশিত নাম৷ মেগা হিট ‘কবীৰ সিঙ’ৰ প্ৰীতি অৰ্থাৎ কিয়াৰা আডৱানী হ’ল বছৰটোৰ সকলোতকৈ ডাঙৰ চমক৷ বছৰটোৰ শেষত মুক্তি পোৱা অক্ষয় কুমাৰৰ ছবি ‘গুড নিউজ’ৰ জৰিয়তেও কিয়াৰাই দৰ্শক-সমালোচকৰ দৃষ্টি আকৰ্ষিত কৰিবলৈ সক্ষম হৈছে৷ আনহাতে, বিগত বৰ্ষত কৰণ জোহৰৰ ছবি ‘লাষ্ট ষ্টৰিজ’ৰ জৰিয়তে কিয়াৰাই সঠিকভাৱেই বুজাইছিল যে তেওঁৰ সৌন্দৰ্য কেৱল মুখমণ্ডল বা দেহতে নাই, অভিনয় প্ৰতিভাৰ সৌন্দৰ্যৰেও তেওঁৰ উজলি উঠিব পৰা সামৰ্থ্য আছে৷ ‘কবীৰ সিঙ’ত তেওঁৰ চৰিত্ৰায়ন সমালোচিত হ’লেও কিয়াৰাই বৃদ্ধি কৰে ‘ব্ৰেণ্ড ভেলু’৷ সেয়েহে হয়তো আগন্তুক বৰ্ষৰ বাবে তেওঁৰ হাতত ইতিমধ্যে ঘোষণা কৰা চাৰিটা প্ৰকল্প৷
‘ডেবিউ’ ছবিতে বলীউডৰ ‘ষ্টেৰিঅ’টাইপ’ ভাঙিছিল ভূমি পেডনেকৰে৷ পৰৱৰ্তী সময়ত একেই ধাৰাৰ চৰিত্ৰত দেখি দেখি দৰ্শকে একঘেয়ামী অনুভৱ কৰিছিল৷ কিন্তু উপযুক্ত সময়ত বাজী ওলোটাই দিয়ে ভূমিয়ে৷ ‘সোণচিড়িয়া’, ‘চান্দ কী আখ’, ‘বালা’, ‘পতি, পত্নী অউৰ ৱ’…’ এই চাৰিখন ছবিত ভিন্ন চৰিত্ৰত অভিনয় কৰি প্ৰমাণ কৰিলে তেওঁৰ অভিনয় দক্ষতা৷ ‘সোণচিড়িয়া’ক বাদ দি বাকী তিনিওখন ছবিয়ে বক্স অফিচত সফল৷ চাৰিওখন ছবিয়ে প্ৰায় ৩০০ কোটিৰ ওচৰত ব্যৱসায় কৰে৷ ভূমিৰ অভিনয়ক লৈ সংশয় নাছিল৷ সেয়ে গ্লেমাৰাছ চৰিত্ৰত অভিনয় কৰিবনে নকৰে সেই বিষয়ে সোধা এটা প্ৰশ্নৰ উত্তৰত ভূমিয়ে এবাৰ কৈছিল, “এতিয়াতো নায়িকাৰ সংজ্ঞা সলনি হৈছে৷ কনটেণ্ট আৰু গ্লেমাৰৰ সংমিশ্ৰণ হৈছে, তেনেকুৱা চৰিত্ৰত অভিনয় কৰিব বিচাৰোঁ৷”
বিদায়ী বৰ্ষটোৰ এখন অন্যতম হিট ছবি আছিল ‘উড়ি : দ্য ছাৰ্জিকেল ষ্ট্ৰাইক’৷ ছবিখনত এটা সৰু চৰিত্ৰত অভিনয় কৰিছিল ইয়ামি গৌতমে৷ সেয়েহে ছবিখনৰ সফলতাৰ অংশীদাৰ তেৱোঁ৷ ‘বালা’ত আয়ুস্মান খুৰানা আৰু ভূমি পেডনেকাৰৰ দৰে শিল্পীৰ ভাল অভিনয়ৰ লগতে ইয়ামিয়েও লাভ কৰে সমালোচকৰ বাহ বাহ৷
বিগত দুটা বছৰত অন্য ধাৰাৰ ছবিৰ জৰিয়তে বলীউডত নিজৰ স্থান মজবুত কৰিছে তাপসী পান্নুৱে৷ এই বছৰো তেওঁৰ দুখন সফল ছবি হ’ল ‘বদলা’ আৰু ‘চান্দ কী আখ’৷
এতিয়া সকলোৰে দৃষ্টি নিবদ্ধ আছে আগন্তুক বছৰটোক লৈ৷ কিয়নো এইসকলৰ সৈতে অভিনয়ৰ প্ৰতিদ্বন্দ্বিতাত অৱতীৰ্ণ হ’ব জাহ্নৱী কাপুৰ আৰু চাৰা আলী খানৰ দৰে নৱাগতাসকল৷ আনহাতে, ইয়াৰ সৈতে থাকিব দীপিকা পাডুকন, আলিয়া ভাটৰ দৰে প্ৰতিষ্ঠিত অভিনেত্ৰী সকলো৷
