নাগৰিকত্ব সংশোধনী আইন চমুকৈ ‘কা’ (CAA) ৰ সাংবিধানিক বৈধতাক প্ৰত্যাহ্বান জনাই উচ্চতম ন্যায়ালয়ত দ্বাৰস্থ হয় কেৰালা চৰকাৰ। ইয়াৰ পূৰ্বে মুখ্যমন্ত্ৰীৰ কাৰ্যালয়ে ঘোষণা কৰিছিল যে কেৰালাত কা’ কাৰ্যকৰী নহ’ব। এয়াই তেওঁলোকৰ চৰকাৰৰ স্থিতি।
আনহাতে, উচ্চতম ন্যায়ালয়ত ‘কা’ৰ বিৰুদ্ধে কেইবাখনো আবেদন দাখিল কৰা হৈছে। ১৯ মাৰ্চ মঙলবাৰে এই সকলোবোৰ আবেদনৰ শুনানি গ্ৰহণ কৰিব উচ্চতম ন্যায়ালয়ে।
উল্লেখযোগ্য যে বিগত ১১ মাৰ্চত কেন্দ্ৰীয় চৰকাৰে ‘কা’ জাৰি কৰে। ইয়াৰ ফলস্বৰূপে ২০১৪ চনৰ ৩১ ডিচেম্বৰৰ পূৰ্বে বাংলাদেশ, পাকিস্তান, আফগানিস্তানৰ পৰা ভাৰতলৈ অহা হিন্দু, শিখ, জৈন, বৌদ্ধ, পাৰ্চী, খ্ৰীষ্টানসকলক এই দেশৰ নাগৰিকত্ব দিয়া হ’ব।
আনহাতে, ১৪ মাৰ্চত কেৰালা চৰকাৰে এই আইনৰ বিৰুদ্ধে উচ্চতম ন্যায়ালয়ৰ কাষ চাপিব বুলি ঘোষণা কৰিছিল। এই সন্দৰ্ভত মুখ্যমন্ত্ৰী পিনাৰায়ী বিজয়নৰ কাৰ্যালয়ে এক বিবৃতিও প্ৰকাশ কৰে। সংবিধানৰ ১৩১ নং অনুচ্ছেদৰ অধীনত উচ্চতম ন্যায়ালয়ত গোচৰ ৰুজু হোৱা বুলি জানিব পৰা গৈছে।
