ASSAM TIMES POST
নগাঁও : নগাঁও জিলা সাহিত্য সভাৰ ২০১৮-২০ বৰ্ষৰ বাৰ্ষিক অধিৱেশনখন আজি উপাসনা শাখা সাহিত্য সভাৰ উদ্যোগত নগাঁও চহৰৰ মিলনপুৰ বিহু তলীত দিনযোৰা কাৰ্যসূচীৰে অনুষ্ঠিত হয়। অধিৱেশন উপলক্ষে পুৱা সভাৰ পতাকা উত্তোলন কৰে নগাঁও জিলা সাহিত্য সভাৰ সভাপতি নিত্যানন্দ বৰাই ।
আনহাতে স্মৃতি তৰ্পন অনুষ্ঠানৰ পিছতেই পুৱা ১০ বজাৰ পৰা অনুষ্ঠিত হয় প্ৰতিনিধি সভা। প্ৰতিনিধি সভাত জিলা সাহিত্য সভাৰ সম্পাদক মৃণাল হাজৰিকাই সম্পাদকীয় প্ৰতিবেদন পাঠ কৰে। প্ৰতিনিধি সভাত ‘কা’ বিৰোধী আন্দোলন চলাই যোৱাৰ লগতে আন কেৱাটাও গুৰুত্বপূৰ্ণ সিদ্ধান্ত গ্ৰহণ কৰা হয়। বিয়লি ১ বজাৰ পৰা অনুষ্ঠিত মুকলি সভাত জিলা সাহিত্য সভাৰ নৱ নিৰ্বাচিত সভাপতি পৰাণ কুমাৰ বৰুৱাক সভাপতিৰ দায়িত্ব আনুষ্ঠানিক ভাৱে অৰ্পণ কৰে বিদায়ী সভাপতি নিত্যানন্দ বৰাই।
আনহাতে নৱ নিৰ্বাচিত সভাপতি পৰাণ কুমাৰ বৰুৱাৰ সভাপতিত্বত অনুষ্ঠিত মুকলি সভাত সমাজ কৰ্মী বল্লদেৱ শৰ্মাই প্ৰয়াত পিতৃ তিলক চন্দ্ৰ দেৱ শৰ্মাৰ স্মৃতিত গঠণ কৰা ন্যাস পূঁজিৰে প্ৰদান কৰি অহা ডঃ সূৰ্য কুমাৰ ভূঞা বঁটা’ ২০২০ প্ৰদান কৰে বিশিষ্ট সাহিত্যিক ডঃ প্ৰফুল্ল মহন্তক। বঁটা গ্ৰহণ কৰি দিয়া ভাষণত ডঃ মহন্তই কয় যে “অসমীয়া জাতি আজি ভয়ংকৰ বিপদত পৰিছে। জাতিটোৰ এই সংকটৰ সময়ত আমি সকলোৱে ঐক্যবদ্ধ ভাৱে জাতিটোৰ সন্মুখত থিয় দিব লাগিব।এই ক্ষেত্ৰত জাতীয় অনুষ্ঠান হিচাপে অসম সাহিত্য সভাই গুৰুত্বপূৰ্ণ ভূমিকা গ্ৰহণ কৰিব লাগিব। এই সভাতেই জিলা সাহিত্য সভা বঁটা প্ৰদান কৰা হ’য় বিশিষ্ট সাহিত্যিক কুসুম বৰাক।
তদুপৰি সাধনা বঁটা প্ৰদান কৰা হ’য় দীগেন মহন্ত, পূন্যদা বৰা, গীতা মহন্ত শইকীয়া, জগন্নাথ মহন্ত আৰু হৰি নৰায়ণ কোঁৱৰক।আনহাতে প্ৰেৰণা বঁটা প্ৰদান কৰা হয় দীপ্তি বৰা, হেলেন পণ্ডিত জ্যোতিকা মনি দাস, অনিমা শৰ্মা বৰুৱা, ভূপেন্দ্ৰ নাথ হাজৰিকা, দেৱকান্ত হাজৰিকাক। ইপিনে, এই সভাতেই জিলা সাহিত্য সভাৰ শ্ৰেষ্ঠ শাখা বঁটা ৰাঙলু শাখা সাহিত্য সভা, শ্ৰেষ্ঠ সংগঠকৰ বঁটা ধিং শতদল শাখা সাহিত্য সভাৰ সম্পাদক মৃগাঙ্ক বৰাক আৰু কামপুৰ শাখা সাহিত্য সভাৰ বাবুল বৰাক প্ৰদান কৰা হ’য়। অনুষ্ঠানতেই সমাজকৰ্মী কাৰ্তিক সাহাৰ প্ৰয়াত পিতৃৰ নামেৰে গঠিত ন্যাসে প্ৰথম বাৰলৈ সমন্বয় বঁটা প্ৰদান কৰে নগাঁৱৰ তিনিজন বিশিষ্ট ব্যক্তি ক্ৰমে ডঃ মাণিক কৰ, দেৱেন্দ্ৰ সিং চেহমী আৰু আলহাজ ছিদুলক।
এই সভাত সলীল মিত্ৰ, কৃষ্ণ মোহন শৰ্মা, কুশল বৰা, ৰজনী নাথক বিশেষ ভাৱে সম্বৰ্ধনা জনোৱা হয়। মুকলি সভা উদ্বোধন কৰি দিয়া ভাষণত অসম সাহিত্য সভাৰ প্ৰধান সম্পাদক পদুম ৰাজখোৱাই কয় যে জাতিটোৰ সুৰক্ষা আৰু অসমীয়া ভাষা-সংস্কৃতিৰ সুৰক্ষাৰ ক্ষেত্ৰত অসম সাহিত্য সভাই কেতিয়াও আপোচ নকৰে।কেন্দ্ৰীয় চৰকাৰে ‘কা’ জাপি দি অসমীয়া ভাষা-সংস্কৃতিক বিপন্ন কৰিব বিচাৰিছে। সভাত বিশিষ্ট সাহিত্যিক সুধাময় দাস, সাংবাদিক মানস কুমাৰ মহন্ত, কনক হাজৰিকা, জিলা সাহিত্য সভাৰ প্ৰাক্তন সভাপতি ডঃ দিলীপ কুমাৰ বৰুৱা,ৰতি মোহন নাথ প্ৰমুখ্যে কেইবাজনো বিশিষ্ট ব্যক্তিয়ে অংশগ্ৰহণ কৰে।অধিৱেশন উপলক্ষে প্ৰকাশ কৰি উলিওৱা স্মৰণিকা খন উন্মোচন কৰে নগাঁও কলেজৰ অধ্যক্ষ ডঃ শৰৎ বৰকটকীয়ে। সভাত আন কেবাখনো গ্ৰন্থ উন্মোচন কৰা হয়।
