নিচাযুক্ত (Drugs) দ্ৰব্যবিৰেধী অভিযানত আন এক সফলতা অসম আৰক্ষীৰ৷ সোমবাৰে পুৱা খটখটীত সন্দেহযুক্ত হেৰইনসহ তিনি সৰবৰাহকাৰীক আটক আৰক্ষীৰ৷ আনহাতে, জব্দ কৰা হেৰইনখিনিৰ মূল্য প্ৰায় ১ কোটি টকা হ’ব বুলি আৰক্ষীয়ে জানিবলৈ দিয়ে৷
খবৰ অনুসৰি, সোমবাৰে পুৱা ৮.৩০ মান বজাত খটখটী ষ্টেট বেংকৰ ওচৰত আৰক্ষীৰ নিয়মীয়া নাকা তালাচীৰ সময়ত মশিপুৰৰ দিশৰ পৰা অৰুণাচল অভিমুখে গৈ থকা এখন বাহনত দলটোৱে তালাচী চলায়৷ AS 01 V 7436 নম্বৰৰ মাৰুতি চুজুকি এল্ট বাহনখনত তালাচী চলাওঁতেই উদ্ধাৰ হয় বৃহৎ পৰিমানৰ হেৰইনখিনি৷
বাহনখনত ১০ টা চাবোনৰ বাকচত লুকুৱাই অনা হৈছিল ১১৭. ৫২ গ্ৰাম ওজনৰ হেৰইনখিনি৷ আনহাতে, এই হেৰইনখিনি সৰবৰাহৰ লগত জড়িত অৰুণাচলৰ নং ইৰাং, তাৰাম ৰিয়ান আৰু বিৰাজ মালিক আৰক্ষীয়ে আটক কৰে৷ আৰক্ষীয়ে অধিক তথ্যৰ বাবে তিনিওকে জিম্মাত ৰাখি তদন্ত অব্যাহত ৰাখিছে৷
উল্লেখ্য যে এভিযানটোৰ নেতৃত্ব দিয়ে বোকাজান মহকুমা আৰক্ষী বিষয়া ৰুস্তমৰাজ ব্ৰক্ষ্মই৷ তেওঁক সহযোগ কৰে খটখটী থানাৰ ভাৰপ্ৰাপ্ত বিষয়া নিতুল শইকীয়া, এছআই জিতুমণি শইকীয়া, অমৰ জ্যোতি শইকীয়াকে ধৰি আৰক্ষীৰ দলে৷
আনহাতে, ইয়াৰ পূৰ্বে দেওবাৰে নিশাও বুজন পৰিমাণৰ ব্ৰাউন ছুগাৰসহ দুই সৰবৰাহকাৰীক আটক কৰে খটখটী আৰক্ষীয়ে৷ নিশা প্ৰায় ৯ বজাত এক গোপন খবৰৰ ভিত্তিত খটখটী আৰক্ষীয়ে এই অভিযান চলায় বুলি সোমবাৰে খটখটী আৰক্ষীৰ এক সূত্ৰৰ পৰা জানিব পৰা গৈছে৷ সূত্ৰ অনুসৰি, অসম-নাগালেণ্ড সীমান্তৰ কালিৰাম বস্তিত নিচাজাতীয় সামগ্ৰী সৰবৰাহৰ এক চুক্তি সন্দৰ্ভত আৰক্ষীয়ে গোপন সূত্ৰে তথ্য লাভ কৰে৷
এই তথ্যৰ ভিত্তিত বোকাজান মহকুমা আৰক্ষী বিষয়াৰ তত্বাৱধানত তথা খটখটী থানাৰ ভাৰপ্ৰাপ্ত বিষয়াৰ নেতৃত্বত এক অভিযান চলাই ডিমাপুৰৰ দিশৰ পৰা খোজকাঢ়ি আহি থকা অৱস্থাত মণিপুৰৰ সেনাপতি জিলাৰ ধন বাহাদুৰ খোৱাৰ আৰু গাম্মিনচোন চাংলোইক তালাচী চলাই ১.৫০ কিলোগ্ৰাম সন্দেহজনক ব্ৰাউন ছুগাৰ উদ্ধাৰ কৰে৷ ইয়াৰ পিছত দুয়ো সৰবৰাহকাৰীক আটক কৰি অধিক তথ্যৰ বাবে জেৰা অব্যাহত ৰাখিছে৷
