ৰাজস্থানত সংঘটিত হৈছে এক ভয়ংকৰ বাছ দুৰ্ঘটনা (Horrific bus accident in Rajasthan)। এখন যাত্ৰীবাহী বাছে এটা কালভাৰ্টত খুন্দা মৰাৰ ফলত বাছখনৰ সন্মুখৰ অংশটো সম্পূৰ্ণৰূপে ধ্বংস হয়। মঙলবাৰে বিয়লি সংঘটিত এই দুৰ্ঘটনাত কমেও ১২ জন লোকে প্ৰাণ হেৰুৱায় (12 people lost their lives)। আনহাতে, আহত হয় আন ২০ জন (20 injured) লোক।
আৰক্ষীয়ে জনোৱা মতে, মঙলবাৰে বাছখন চালাছৰৰ পৰা লক্ষ্মণগড়লৈ গৈ আছিল। বাছখনত আছিল ৪০ গৰাকী যাত্ৰী। ছিকাৰ জিলাৰ লক্ষ্মণগড়ত মঙলবাৰে দিনৰ প্ৰায় ২ বজাত বাছখনে কালভাৰ্টত খুন্দা মাৰে। প্ৰত্যক্ষদৰ্শীয়ে জনোৱা মতে, বাছখনে নিয়ন্ত্ৰণ হেৰুৱাই কালভাৰ্টত খুন্দা মাৰে।
ইফালে দুৰ্ঘটনা সংঘটিত হোৱাৰ লগে লগে স্থানীয় লোকে গৈ কালভাৰ্টটোত উপস্থিত হয় আৰু বাছখনৰ পৰা যাত্ৰীসকলক উদ্ধাৰ কৰিবলৈ আৰম্ভ কৰে। এই তথ্য লাভ কৰাৰ পিছতে আৰক্ষীও উক্ত স্থানত উপস্থিত হয়। ইয়াৰ পিছত আহতসকলক বাছখনৰ পৰা উদ্ধাৰ কৰি লক্ষ্মণগড় চিকিৎসালয়ত ভৰ্তি কৰোৱা হয়। ছিকাৰ হাস্পতালৰ অধীক্ষক মহেন্দ্ৰ খিছাৰে জনোৱা মতে, এই পৰ্যন্ত ১২ জন লোকৰ মৃত্যু হৈছে। আহতসকলৰ চিকিৎসা চলি আছে। আনহাতে, এই দুৰ্ঘটনাত শোক প্ৰকাশ কৰিছে ৰাজস্থানৰ মুখ্যমন্ত্ৰী ভজনলাল শৰ্মাই। তেওঁ মৃতকৰ পৰিয়াললৈ সমবেদনা জ্ঞাপন কৰে। ৰাজস্থানৰ মুখ্যমন্ত্ৰীয়ে আহতসকলৰ বাবে প্ৰয়োজনীয় চিকিৎসাৰ ব্যৱস্থা কৰিবলৈও নিৰ্দেশ দিয়ে।
