ৰাইজৰ তীব্ৰ প্ৰতিবাদ আৰু ন্যায়ালয়ৰ হস্তক্ষেপত সুৰ সলাবলৈ বাধ্য হ’ল ৰাজ্য চৰকাৰে। অৱশেষত মুখ্যমন্ত্ৰীয়ে ঘোষণা কৰে যে উৰণ সেতু নিৰ্মাণৰ বাবে দীঘলীপুখুৰী পাৰৰ (Dighalipukhuri Tree) শতবছৰীয়া গছ কটা নহয়৷ তেওঁ লগতে জনায় যে নুনমাটি-ৰিজাৰ্ভ বেংক উৰণ সেতুখন ৰবীন্দ্ৰ ভৱনৰ ওচৰতেই সমাপ্ত হ’ব।
মঙলবাৰে নিশা চানমাৰিত নিৰ্মীয়মাণ উৰণ সেতুখনৰ নিৰ্মাণকাৰ্য পৰিদৰ্শন কৰি সামাজিক মাধ্যমযোগে এই কথা ঘোষণা কৰে মুখ্যমন্ত্ৰীয়ে৷ তেওঁ চানমাৰিত উৰণ সেতু নিৰ্মাণ স্থান পৰিদৰ্শন কৰি গছবোৰ যাতে সংৰক্ষণ কৰিব পৰা যায় তাৰ বাবে ইয়াৰ ডিজাইন আৰু দৈৰ্ঘ্যত কিছু পৰিৱৰ্তনৰ কথা ঘোষণা কৰে।
মুখ্যমন্ত্ৰীয়ে কয়, “কিছু সময় পূৰ্বে নিৰ্মীয়মাণ চানমাৰি উৰণ সেতুখনৰ নিৰ্মাণকাৰ্য পৰিদৰ্শন কৰিলোঁ। আমি ইয়াৰ দৈৰ্ঘ্য আৰু এলাইনমেণ্ট পইণ্টত কিছু সৰু সৰু সালসলনি কৰি ২০২৬ চনৰ পূৰ্বে এই উৰণ সেতুখন সম্পূৰ্ণ কৰাৰ পৰিকল্পনা কৰিছোঁ৷”
