ইনষ্টামাৰ্ট-এ প্ৰকাশ কৰা তথ্য অনুসৰি, গুৱাহাটী মহানগৰ (Guwahati city) ভাৰতৰ আটাইতকৈ দ্ৰুতগতিত বৃদ্ধি পোৱা ‘পেট কেয়াৰ’ বজাৰ (‘Pet Care’ Market) হিচাপে পৰিগণিত হৈছে। চহৰখনত পোহনীয়া জীৱ-জন্তুৰ সামগ্ৰীৰ অৰ্ডাৰৰ ক্ষেত্ৰত বছৰি অভিলেখ সৃষ্টিকাৰী ১,৪৭৩ শতাংশ বৃদ্ধি দেখা গৈছে। এই পৰিসংখ্যাই সমগ্ৰ দেশতে পোহনীয়া জীৱ-জন্তু কেৱল পোহাৰ পৰিৱৰ্তে সিহঁতক সন্তানৰ দৰে প্ৰতিপালন কৰাৰ দ্ৰুত মানসিকতাৰ পৰিৱৰ্তনক সূচাইছে। ১৩৩খনতকৈও অধিক চহৰত ২০২৫ৰ জুন মাহৰ পৰা ২০২৬ৰ জুনৰ ভিতৰত হোৱা ইনষ্টামাৰ্ট অৰ্ডাৰৰ ওপৰত আধাৰিত এই প্ৰতিবেদনত দেখা গৈছে যে, উন্নত মানদণ্ডৰ খাদ্য, গ্ৰুমিং সামগ্ৰী, স্বাস্থ্যবৰ্ধক ছাপ্লিমেণ্ট আৰু বিশেষ খাদ্য-ৰ বৰ্ধিত চাহিদাৰ বাবে দেশজুৰি পেট কেয়াৰ অৰ্ডাৰ বছৰি ৪১ শতাংশ বৃদ্ধি পাইছে।
দ্বিতীয় শ্ৰেণীৰ আৰু ক্ষুদ্ৰ চহৰসমূহ এই বৃদ্ধিৰ মুখ্য চালিকা শক্তি হৈ পৰিছে, য’ত যোৱা এটা বছৰত পেট কেয়াৰ অৰ্ডাৰ পৰিমাণ ৯৬ শতাংশ বৃদ্ধি পাইছে। এই অধ্যয়নে গ্ৰাহকৰ পৰিৱৰ্তিত পছন্দসমূহো পোহৰলৈ আনিছে। মেকুৰীৰ খাদ্যৰ চাহিদা মুঠ পোহনীয়া জীৱৰ খাদ্যৰ চাহিদাৰ প্ৰায় ৬০ শতাংশ আৰু এই প্লেটফৰ্মত ই আটাইতকৈ বেছি চাৰ্চ কৰা শব্দ হিচাপে ধৰা দিছে। চৰাইৰ খাদ্যৰ অৰ্ডাৰ ১৭৮ শতাংশ আৰু শহাপহুৰ খাদ্যৰ অৰ্ডাৰ ১৩০ শতাংশ বৃদ্ধি পাইছে। শস্যবিহীন পোহনীয়া জীৱৰ খাদ্যৰ ক্ষেত্ৰত ১৫২ শতাংশ বৃদ্ধি লিপিবদ্ধ কৰা হৈছে, যাৰ ফলত ই আটাইতকৈ দ্ৰুতগতিত বৃদ্ধি পোৱা পুষ্টি খণ্ড হৈ পৰিছে।
আনহাতে কুকুৰৰ শ্বেম্পুৰ বাবে চাৰ্চৰ পৰিমাণ ৬০০ শতাংশ বৃদ্ধি পাইছে, যিয়ে পোহনীয়া জীৱৰ গ্ৰুমিং বা বাহ্যিক পৰিচৰ্যাৰ প্ৰতি বৰ্ধিত মনোযোগক সূচাইছে। গুৱাহাটী মহানগৰীৰ এই ব্যতিক্ৰমী বৃদ্ধিয়ে স্থানীয় লোকৰ বৰ্ধিত আয়, পোহনীয়া জীৱৰ স্বাস্থ্য আৰু সুস্থতাৰ প্ৰতি বৰ্ধিত সজাগতা আৰু প্ৰিমিয়াম সামগ্ৰী গ্ৰহণ কৰাৰ প্ৰৱণতাক প্ৰতিফলিত কৰিছে। এই ধাৰাই উত্তৰ-পূব ভাৰতক লক্ষ্য কৰি লোৱা পেট কেয়াৰ ব্ৰেণ্ডসমূহৰ বাবে গুৱাহাটীক এক মুখ্য কেন্দ্ৰ হিচাপে প্ৰতিষ্ঠা কৰিছে, য’ত স্থানীয় চাহিদাৰ সৈতে দেশৰ অন্যান্য প্ৰান্তৰ বিশেষ পুষ্টি, গ্ৰুমিং সামগ্ৰী আৰু বিশেষ খাদ্যৰ পছন্দৰ সৈতে সংগতি থকা দেখা গৈছে।
প্ৰতিবেদনখনত লগতে উল্লেখ কৰা হৈছে যে বেংগালুৰু এতিয়াও ভাৰতৰ সৰ্বাধিক ব্যয় কৰা পেট কেয়াৰ বজাৰ হৈ আছে। আনহাতে দিল্লীৰ এজন পোহনীয়া জীৱৰ মালিকে যোৱা এটা বছৰত পেট কেয়াৰৰ নামত ৬০,৯৫৭ টকা খৰচ কৰিছে, যিয়ে নিজৰ পোহনীয়া জীৱটোৰ সুস্থতাৰ বাবে ভাৰতীয়সকলৰ খৰচ কৰাৰ বৰ্ধিত ইচ্ছাক প্ৰমাণ কৰে।
