‘লিভ-ইন’ বা একত্ৰবাসৰ ক্ষেত্ৰত পঞ্জীয়ন বাধ্যতামূলক কৰাৰ দিশত আগবাঢ়িছে অসম চৰকাৰ। সোমবাৰে অসম বিধানসভাত (Assam Legislative Assembly) উত্থাপন কৰা হয় অভিন্ন দেৱানী বিধা বা ইউনিফৰ্ম চিভিল কোড বিধেয়ক (Uniform Civil Code Bill)। ইয়াত উল্লেখ কৰা নিয়মসমূহৰ ভিতৰত একত্ৰবাসৰ সৈতে জড়িত নিয়মসমূহ অন্তৰ্ভুক্ত কৰা হৈছে। ইয়াৰ অধীনত একত্ৰবাসত থকা দম্পতীয়ে পঞ্জীয়ন কৰিব লাগিব। ইয়াৰ উপৰি বিবাহ, বিবাহ বিচ্ছেদ আৰু উত্তৰাধিকাৰ সম্পৰ্কীয় বিভিন্ন বিষয়ো অসম ইউচিচিত উল্লেখ আছে। অৱশ্যে কংগ্ৰেছ, তৃণমূল কংগ্ৰেছ, ৰাইজৰ দলসহ বিৰোধী দলসমূহে এই বিধেয়ক উত্থাপনৰ বিৰোধিতা কৰে। বিধেয়কখন উত্থাপনৰ পূৰ্বে সকলো পক্ষৰ সৈতে বিতং আলোচনাৰ দাবী জনায়।
সোমবাৰে মুখ্যমন্ত্ৰী হিমন্ত বিশ্ব শৰ্মাৰ হৈ অসম গণ পৰিষদৰ সভাপতি তথা বিধায়ক অতুল বৰাই বিধানসভাত উত্থাপন কৰে এই বিধেয়কখন। এই বিধেয়কখনৰ এটা উদ্দেশ্য হৈছে বহুবিবাহ নিষিদ্ধ কৰা আৰু একত্ৰবাসৰ ক্ষেত্ৰত পঞ্জীয়ন বাধ্যতামূলক কৰা। বিধেয়কখনৰ উদ্দেশ্য আৰু কাৰণ সন্দৰ্ভত এক বিবৃতিত মুখ্যমন্ত্ৰীয়ে কয় যে ইয়াৰ লক্ষ্য হৈছে বিবাহ, বিবাহ বিচ্ছেদ, উত্তৰাধিকাৰ আৰু একত্ৰবাসৰ সৈতে জড়িত নিয়মসমূহ অধিক সুদৃঢ় আৰু সৰল কৰা। এই বিধেয়কখনত বহুবিবাহতো নিষেধাজ্ঞা আৰোপ কৰা হৈছে। ইয়াৰ উপৰি পুৰুষৰ বিবাহৰ ন্যূনতম বয়স ২১ বছৰ আৰু মহিলাৰ বাবে ১৮ বছৰলৈ বৃদ্ধি কৰা হৈছে।
মুখ্যমন্ত্ৰীয়ে কয়, “এই বিধেয়কখনে অসমত প্ৰথমবাৰৰ বাবে সহবাসৰ সম্পৰ্কক আইনী গাঁথনিৰ অধীনলৈ আনিছে। সম্পৰ্কক পঞ্জীয়নৰ বাবে বাধ্যতামূলক কৰি এই আইনখনে একত্ৰবাসৰ সংগীৰ অধিকাৰ সুৰক্ষিত কৰিব। একে সময়তে এনে সম্পৰ্কৰ পৰা জন্ম লোৱা যিকোনো শিশুৰ অধিকাৰকো স্বীকৃতি আৰু সুৰক্ষা প্ৰদান কৰিব।” অৱশ্যে এই একেধৰণৰ নাগৰিক সংহিতা অসমত বসবাস কৰা অনুসূচিত জনজাতিসকলৰ ক্ষেত্ৰত প্ৰযোজ্য নহ’ব বুলিও মুখ্যমন্ত্ৰীয়ে কয়।
উল্লেখ্য যে দেওবাৰে কেন্দ্ৰীয় গৃহমন্ত্ৰী অমিত শ্বাহে জনজাতীয় লোকৰ ক্ষেত্ৰত ইউনিফৰ্ম চিভিল কোড প্ৰযোজ্য নহ’ব বুলিও কয়। এই সংহিতাই আদিবাসীসকলৰ জীৱনত কোনো ধৰণৰ প্ৰভাৱ নেপেলায় বুলি তেওঁ আশ্বাস দিয়ে। একে সময়তে এই বিষয়ত ‘ষড়যন্ত্ৰমূলকভাৱে ভুল তথ্য প্ৰচাৰ কৰা হৈছে’ বুলিও অভিযোগ উত্থাপন কৰে। তেওঁ কয়, “এতিয়া এটা ষড়যন্ত্ৰ আৰম্ভ হৈছে। কোৱা হৈছে যে ইউনিফৰ্ম চিভিল কোডে আদিবাসীৰ সংস্কৃতি, পৰম্পৰা আৰু নিজৰ ৰীতি-নীতি পালন কৰাৰ অধিকাৰ কাঢ়ি নিব। মই স্পষ্টকৈ ক’ব বিচাৰোঁ যে ইউনিফৰ্ম চিভিল কোডৰ কোনো নিয়ম জনজাতিৰ ওপৰত জাপি দিয়া নহ’ব।”
উল্লেখ্য যে বিজেপিশাসিত উত্তৰাখণ্ডত প্ৰথমবাৰৰ বাবে যোৱা বছৰৰ জানুৱাৰী মাহত ইউনিফৰ্ম চিভিল কোড কাৰ্যকৰী কৰা হৈছিল। ইয়াৰ পিছত এই সন্দৰ্ভত বিধেয়কখন যোৱা মাৰ্চ মাহত গুজৰাটত গৃহীত হৈছিল। এইবাৰ অসমতো উত্থাপন হয় ইউনিফৰ্ম চিভিল কোড বিধেয়ক।
