আগৰ ব্যৱসায়ীলৈ সকাহঃ চৰকাৰৰ সিদ্ধান্তক আদৰণি জমিয়তৰ সভাপতিৰ

ASSAM TIMES POST,গুৱাহাটী: অসমৰ মুখ্যমন্ত্ৰী সৰ্বানন্দ সোণোৱাল নেতৃত্বাধীন ৰাজ্য চৰকাৰখনে সোমবাৰে কেবিনেট বৈঠকত নতুন ঔদ্যোগিক নীতিত অনুমোদন জনাই ৰাজ্যখনৰ আগৰ কাঠৰ খেতিয়কসকলক সকাহ দিয়া সিদ্ধান্তক আদৰণি জনাইছে অসম ৰাজ্যিক জমিয়ত উলামাৰ সভাপতি আৰু আন্তঃৰাষ্ট্ৰীয় আগৰ ব্যৱসায়ী মৌলানা মুস্তাক আনফাৰে। সেইদিনা কেবিনেটত বাধ্যবাধকতা অবিহনে নিজা প্ৰচেষ্টাত ৩৫ বিঘা মাটি পৰ্যন্ত আগৰ খেতি কৰাৰ ক্ষেত্ৰত অনুমতি প্ৰদানৰ সিদ্ধান্ত গ্ৰহণ কৰা হৈছিল। তদুপৰি চৰকাৰে গোলাঘাটত আগৰৰ বিক্ৰী আৰু ক্ৰয়ৰ বাবে তথা প্ৰছেচিং ইউনিটসহ আন্তঃৰাষ্ট্ৰীয় আগৰ কাঠ বাণিজ্য কেন্দ্ৰ স্থাপনৰ সিদ্ধান্ত গ্ৰহণ কৰে। এই ব্যৱস্থাই উজনি আৰু মধ্য অসমৰ খেতিয়ক আৰু নিবনুৱা যুৱকসকলক লাভান্বিত কৰিব। মুখ্যমন্ত্ৰী সোণোৱাল আৰু তেওঁৰ কেবিনেটক ধন্যবাদ জনাই আনফাৰে কয় যে অসমৰ অৰ্থনৈতিক বিকাশৰ ক্ষেত্ৰত এয়া অতি গুৰুত্বপূৰ্ণ পদক্ষেপ। স্থানীয় সংবাদদাতাৰ সৈতে বৃহস্পতিবাৰে বাৰ্তালাপ কৰি আনফাৰে প্ৰকাশ কৰে যে অসমত আগৰ ব্যৱসায়ৰ সৈতে ২০ লাখৰো অধিক লোক জড়িত হৈ আছে আৰু অনাগত দিনসমূহত আৰু অধিক লোক ইয়াৰ সৈতে জড়িত হ’ব। তদুপৰি গোলাঘাটত প্ৰস্তাৱিত বাণিজ্য কেন্দ্ৰই অসমৰ পৰ্যটন ক্ষেত্ৰখনত ইতিবাচক প্ৰভাৱ পেলাব কিয়নো বাণিজ্যিক উদ্দেশ্যৰে সমগ্ৰ বিশ্বৰপৰা আগৰ ব্যৱসায়ী আৰু ক্ৰেতা অসমলৈ আহিব। তদুপৰি যদি ই নিয়ন্ত্ৰিত হয় তেতিয়া চৰকাৰে ইয়াৰপৰা শকত পৰিমাণৰ ৰাজহ লাভ কৰিব বুলি আনফাৰে কয়। তেওঁ আগৰ কাঠৰ ব্যৱসায়ত পূৰ্বে থকা বাধ্যবাধকতা আতঁৰাই আগৰ ব্যৱসায়ৰ অগ্ৰগতিৰ অৰ্থে সক্ৰিয় ভূমিকা পালন কৰাৰ বাবে চৰকাৰখনক পুনৰ ধন্যবাদ জনায়।