অৱশেষত লোকসভাত গৃহীত হ’ল এক দেশ, এক নিৰ্বাচন (One Nation, One Election) সম্পৰ্কীয় দুখনকৈ বিধেয়ক। কেন্দ্ৰীয় আইন মন্ত্ৰী অৰ্জুন ৰাম মেঘৱালে উত্থাপন কৰা ‘এক ৰাষ্ট্ৰ, এক নিৰ্বাচন’ সন্দৰ্ভত সংবিধান (১২৯ সংখ্যক সংশোধনী) বিধেয়ক, ২০২৪ আৰু কেন্দ্ৰীয়শাসিত অঞ্চল আইন (সংশোধনী) বিধেয়ক, ২০২৪ লোকসভাত ৬৫টা ভোটৰ ব্যৱধানত গৃহীত হয়।
এই বিধেয়কখনৰ সপক্ষে ২৬৯ গৰাকী সদস্যই আৰু ১৯৬ গৰাকী সদস্যই বিপক্ষে ভোটদান কৰে। এই বিধেয়কখনে লোকসভা আৰু ৰাজ্যৰ বিধানসভা দুয়োটাৰ বাবে একেলগে নিৰ্বাচনৰ প্ৰস্তাৱ আগবঢ়াইছে। আনহাতে, মঙলবাৰে লোকসভাৰ অধ্যক্ষই সদনত বিধেয়কখন প্ৰৱৰ্তনৰ ওপৰত ভোটদানৰ ফলাফল ঘোষণা কৰাৰ পিছত আইন মন্ত্ৰী অৰ্জুন ৰাম মেঘৱালে ইয়াৰ আনুষ্ঠানিক প্ৰৱৰ্তনৰ বাবে জেপিচিলৈ প্ৰেৰণৰ সিদ্ধান্ত লয়।
কেন্দ্ৰীয় গৃহ মন্ত্ৰী অমিত শ্বাহৰ বক্তব্যৰ পিছতে কেন্দ্ৰীয় আইন মন্ত্ৰীয়ে বিধেয়কখন জে পি চিলৈ প্ৰেৰণ কৰাৰ সন্মতি আগবঢ়ায়। এতিয়া সংসদৰ যুটীয়া সমিতিত বিতং আলোচনাৰ পিছত এই বিধেয়কখন পৰৱৰ্তী পদক্ষেপ হিচাপে ৰাজ্যসভাত গৃহীত কৰাৰ বাবে উত্থাপন কৰা হ’ব।
আনহাতে, ৰাজ্যসভাত বিধেয়কখন গৃহীত হোৱাৰ পিছত ৰাষ্ট্ৰপতিৰ অনুমোদনৰ বাবে প্ৰেৰণ কৰা হ’ব। ৰাষ্ট্ৰপতিৰ অনুমোদনৰ পিছতেই ই আইনত পৰিণত হ’ব। অৱশ্যে জেপিচিত এই বিধেয়কখনে প্ৰত্যাহ্বানৰ সন্মুখীন হোৱাৰ সম্ভাৱনা আছে।
