নতুন বছৰটোক কেনেদৰে আদৰিব তাকে লৈ উৎসাহিত হৈ পৰিছে নেটিজেনসকল। প্ৰায় সকলোৱেই নতুন বছৰটোক আদৰিবলৈ কম-বেছি পৰিমাণে আয়োজন কৰিবলৈ আৰম্ভ কৰিছে। ইয়াৰ বাবে যদি কোনোবাই ৰিল বনাইছে, কোনোবাই আকৌ পোষ্ট কৰিছে। কিন্তু নতুন বছৰটোক আদৰিবলৈ এজন ব্যক্তিয়ে হঠাতে ৰাজপথত কৰে এক ভয়ংকৰ কাণ্ড। তেওঁ ৰাজপথতে জুই লগাই দিয়ে। ঘটনাটো উত্তৰ প্ৰদেশ (Uttar Pradesh)ৰ।
জানিব পৰা মতে ব্যক্তিজনৰ নাম শ্বেখ বিলাল (Sheikh Bilal)। তেওঁ ইনষ্টাগ্ৰামত ৰিল (Reel on Instagram) বনাবলৈ উত্তৰ প্ৰদেশৰ ফতেহপুৰৰ ৰাষ্ট্ৰীয় ঘাইপথত এই অপৰাধ সংঘটিত কৰে। এজন প্ৰত্যক্ষদৰ্শীয়ে এই বিষয়ে লিখিছে, “এইদৰে এজন লোকে ৰাজপথত ষ্টাণ্ট কৰিছে। কিয় প্ৰশাসনে এই বিষয়ে একো কোৱা নাই?” পোষ্টটোত আনুষংগিক ভিডিঅ’টোও সংলগ্ন কৰা হৈছে। নিমিষতে ভাইৰেল হৈ পৰে এই ভিডিঅ’। অৱশ্যে ফতেহপুৰ আৰক্ষীৰ বিষয়টো দৃষ্টিগোচৰ হোৱাৰ লগে লগে ক্ষিপ্ৰতাৰে পদক্ষেপ গ্ৰহণ কৰে। আৰক্ষীয়ে ততাতৈয়াকৈ ঘটনাস্থলীত উপস্থিত হৈ আইন ভংগৰ অপৰাধত তেওঁক গ্ৰেপ্তাৰ কৰে। পেট্ৰ’ল ঢালি জুই লগাই দিয়া পথটোত আৰক্ষী মোতায়েন কৰি পৰৱৰ্তীয় সময়ত পথটো মুকলি কৰি দিয়া হয়।
উল্লেখ্য যে ছচিয়েল মিডিয়া (Social Media)ত জনপ্ৰিয়তা লাভ কৰিবলৈ বহুতে বহু কাম কৰে। ইয়াৰ পূৰ্বে মীৰাটৰ এজন লোকে নিজৰ চাৰিচকীয়া বাহনেৰে অদ্ভুত কাম কৰা দেখা গৈছিল। ইন্তেজাৰ আলী নামৰ লোকজনে প্ৰথমে নিজৰ গাড়ীৰ ওপৰত বোকা ভৰায় আৰু ইয়াৰ পিছত গাড়ীখন তীব্ৰ বেগেৰে চলায়। ফলত চৌপাশৰ মানুহৰ গাত বোকা ছিটিকি পৰে। এই ভিডিঅ’টো ইণ্টাৰনেটত প্ৰকাশ পোৱাৰ পিছত বহু লোকে তেওঁৰ দায়িত্বহীন আচৰণৰ বাবে সমালোচনা কৰে। অৱশ্যে পিছত আৰক্ষীয়ে অভিযুক্তৰ সন্ধান উলিয়াই তেওঁৰ গাড়ীখন জব্দ কৰে।
আনহাতে, হাৰিয়ানাৰ পাণিপথত এজন লোকে অন্তৰ্বাস পিন্ধি ৰিল বনাবলৈ নাচিবলৈ আৰম্ভ কৰে। ঘটনাস্থলীত উপস্থিত মহিলাসকলে তেওঁৰ অশ্লীল আচৰণত অস্বস্তি অনুভৱ কৰে। অৱশেষত স্থানীয় একাংশ দোকানীৰ হস্তক্ষেপত তেওঁৰ সেই ৰিল বনোৱা কাৰ্য বন্ধ হয়।
