ASSAM TIMES POST
নিউজ ডেস্ক
অসম লোকসেৱা আয়োগৰ নতুন অধ্যক্ষ হিচাপে নিযুক্তি দিয়া হৈছে পল্লৱ ভট্টাচাৰ্যক। অসম আৰক্ষীৰ বিশেষ শাখাৰ প্ৰাক্তন সঞ্চালক প্ৰধান ভট্টাচাৰ্যক নতুন অধ্যক্ষ হিচাপে শুকুৰবাৰে নিযুক্তি দিয়া হয়। উল্লেখ্য যে দুৰ্নীতিগ্ৰস্ত অধ্যক্ষ ৰাকেশ পালৰ নিলম্বনৰ পিছত উক্ত আসনত ভাৰপ্ৰাপ্ত অধ্যক্ষৰ দায়িত্বত আছিল অনুপম ৰয়। নতুন অধ্যক্ষ হিচাপে আইপিএছ পল্লৱ ভট্টাচাৰ্যক নিযুক্তি দিয়াৰ কথা প্ৰকাশ কৰিছে মুখ্য মন্ত্ৰী কাৰ্যালয়ে।
আনহাতে, পল্লৱ ভট্টাচাৰ্যৰ লগতে অসম লোকসেৱা আয়োগত দুগৰাকী নতুন সদস্যও নিযুক্তি দিয়া হৈছে। ভাৰতীয় অসামৰিক সেৱাৰ বিষয়া সঞ্জীৱ গোঁহাই বৰুৱা আৰু এছবি দেওৰা মহাবিদ্যালয়ৰ উপাধ্যক্ষ নিৰঞ্জন কলিতাক আয়োগৰ নতুন সদস্য হিচাপে নিযুক্তি দিয়া হৈছে।
উল্লেখ্য যে নৱ-নিযুক্ত অধ্যক্ষ পল্লৱ ভট্টাচাৰ্যই ১৯৮৬ বৰ্ষৰ ভাৰতীয় অসামৰিক সেৱা বিভাগৰ কেডাৰ হিচাপে নিযুক্তি পাইছিল। অসম আৰক্ষীৰ বিশেষ শাখাৰ সঞ্চালক প্ৰধান হিচাপে তেওঁ ২০১৯ৰ জানুৱাৰী মাহত অসৱৰ গ্ৰহণ কৰিছিল।
