মহাকাশৰ পৰা দহটা কৃত্ৰিম উপগ্ৰহই ভাৰত আৰু ইয়াৰ জনসাধাৰণৰ সুৰক্ষা আৰু নিৰাপত্তাৰ কাম কৰি আছে। এই কথা উল্লেখ কৰিছে ভাৰতীয় মহাকাশ গৱেষণা সংস্থাৰ (ইছৰো) (ISRO) অধ্যক্ষ ভি নাৰায়ণে।
দেওবাৰে মণিপুৰৰ ইম্ফলস্থিত কেন্দ্ৰীয় কৃষি বিশ্ববিদ্যালয়ত অনুষ্ঠিত এক অনুষ্ঠানত তেওঁ এই কথা কয়। তাতে ইছৰোৰ মুৰব্বীগৰাকীয়ে এই ১০টা কৃত্ৰিম উপগ্ৰহৰ বিষয়ে কয়। তেওঁ আৰু কয় যে এই কৃত্ৰিম উপগ্ৰহসমূহৰ কৌশলগত উদ্দেশ্য হৈছে দেশবাসীৰ নিৰাপত্তা নিশ্চিত কৰা।
এই কৃত্ৰিম উপগ্ৰহসমূহে উক্ত লক্ষ্যৰ দিশত অবিৰতভাৱে কাম কৰি আছে। উল্লেখ্য যে ইছৰোৰ মুৰব্বীগৰাকীয়ে ভাৰত-পাক সংঘাত আৰু তাৰ পাছৰ যুদ্ধবিৰতিৰ মাজতে এই মন্তব্য কৰে। ইছৰোৰ অধ্যক্ষ নাৰায়ণে কয় যে মহাকাশ শক্তিৰ ক্ষেত্ৰত ভাৰত ক্ৰমান্বয়ে এক প্ৰাণৱন্ত ৰাষ্ট্ৰলৈ পৰিণত হৈছে।
২০৪০ চনৰ ভিতৰত ভাৰতে প্ৰথম মহাকাশ ষ্টেচনো পাব বুলি তেওঁ নিশ্চিত। ইম্ফলৰ অনুষ্ঠানত তেওঁ কয় যে এতিয়ালৈকে ভাৰতৰ পৰা ৩৪খন দেশৰ ৪৩৩টা কৃত্ৰিম উপগ্ৰহ মহাকাশলৈ প্ৰেৰণ কৰা হৈছে। ভাষণৰ এটা সময়ত তেওঁ দেশৰ নিৰাপত্তা আৰু সুৰক্ষাৰ ক্ষেত্ৰত মহাকাশ গৱেষণাৰ গুৰুত্বৰ ওপৰতো আলোকপাত কৰে।
ইছৰোৰ মুৰব্বীগৰাকীয়ে কয়, “সকলোৱে আমাৰ ওচৰ-চুবুৰীয়াৰ বিষয়ে জানে। দেশৰ নিৰাপত্তা নিশ্চিত কৰিবলৈ আমি কৃত্ৰিম উপগ্ৰহৰ জৰিয়তে ইয়াক পূৰণ কৰিব লাগিব। আমাৰ ৭০০০ কিলোমিটাৰ দীঘল উপকূলৰ ওপৰত চকু ৰাখিব লাগিব। সমগ্ৰ উত্তৰ অংশত আমি অহৰহ সতৰ্কতা অৱলম্বন কৰিব লাগিব।” তেওঁৰ মতে, দেশৰ নিৰাপত্তা সুনিশ্চিত কৰিবলৈ কৃত্ৰিম উপগ্ৰহ আৰু ড্ৰোন প্ৰযুক্তিৰ প্ৰয়োজনীয়তা অনস্বীকাৰ্য।
