শেহতীয়াভাৱে গৌৰৱ গগৈৰ (Gaurav Gogoi) পাকিস্তান সংযোগক লৈ সোচ্চাৰ হৈ আহিছে মুখ্যমন্ত্ৰী ডঃ হিমন্ত বিশ্ব শৰ্মা। গৌৰৱ গগৈৰ পত্নীৰ পাকিস্তান সংযোগ আৰু সাংসদগৰাকীৰ পাকিস্তান ভ্ৰমণ সন্দৰ্ভত সততে সৰৱ হৈ আহিছে মুখ্যমন্ত্ৰী। এইবাৰ গৌৰৱ গগৈ সন্দৰ্ভত লোকসভাত বিৰোধী দলপতি তথা কংগ্ৰেছ নেতা ৰাহুল গান্ধীক বিশেষ আহ্বান মুখ্যমন্ত্ৰীৰ।
উল্লেখযোগ্য যে শেহতীয়াভাৱে পহেলগাম আক্ৰমণৰ প্ৰতিশোধ হিচাপে ভাৰতে পাকিস্তান আৰু পাক অধিকৃত কাশ্মীৰৰ কেইবাটাও স্থানত আক্ৰমণ কৰি সন্ত্ৰাসবাদী শিবিৰ ধ্বংস কৰে। ইয়াৰ পিছত পাকিস্তানেও জম্মু-কাশ্মীৰৰ সীমান্তৱৰ্তী গাঁৱত আক্ৰমণ চলায়।
ফলত উত্তেজনা বৃদ্ধি পায়। অৱশ্যে পিছত এই উত্তেজনাৰ শাম কাটে আৰু দুয়োখন দেশে যুদ্ধবিৰতি চুক্তিত উপনীত হয়। অৱশ্যে ইয়াৰ মাজতে ভাৰতে ঘোষণা কৰিছে যে সন্ত্ৰাসবাদীৰ বিৰুদ্ধে ভাৰতে আৰম্ভ কৰা অপাৰেচন সিন্দূৰ অব্যাহত থাকিব। লগতে আন কেতবোৰ কূটনৈতিক সিদ্ধান্তও গ্ৰহণ কৰে।
ইয়াৰে অংশ হিচাপে ভাৰত চৰকাৰে এটা সৰ্বদলীয় প্ৰতিনিধি দল বিশ্বৰ বিভিন্ন প্ৰান্তলৈ প্ৰেৰণ কৰি পাকিস্তানৰ সন্ত্ৰাসবাদ সংযোগৰ বিষয়ে প্ৰচাৰৰ সিদ্ধান্ত লোৱা হয়। এই প্ৰতিনিধি দলটোত কংগ্ৰেছৰ প্ৰতিনিধিও থাকিব বুলি প্ৰকাশ পাইছে। তাৰেই পৰিপ্ৰেক্ষিতত শনিবাৰে সামাজিক মাধ্যমযোগে মুখ্যমন্ত্ৰী ডঃ হিমন্ত বিশ্ব শৰ্মাই এই প্ৰতিনিধি দলটোত গৌৰৱ গগৈক অন্তৰ্ভুক্ত নকৰিবলৈ আহ্বান জনায়।
সামাজিক মাধ্যমৰ পোষ্টটোত মুখ্যমন্ত্ৰীয়ে লিখিছে, “তালিকাখনত নাম উল্লেখ কৰা এগৰাকী সাংসদে (অসমৰ) তেখেত দীৰ্ঘদিন পাকিস্তান ভ্ৰমণ কৰাৰ বিষয়ে অস্বীকাৰ কৰা নাই৷ খবৰ অনুসৰি দুসপ্তাহ তেওঁ তাত আছিল আৰু বিশ্বাসযোগ্য নথি-পত্ৰৰ পৰা এয়া স্পষ্ট হৈছে যে তেখেতৰ পত্নীয়ে ভাৰতত কাম কৰি থকাৰ সময়ত পাকিস্তানস্থিত এন জি অ’ এটাৰ পৰা দৰমহাৰ নামত ধন লাভ কৰিছিল।”
লগতে লিখিছে, “মাননীয় বিৰোধী দলৰ নেতা ৰাহুল গান্ধীক আহ্বান জনাইছোঁ যে ৰাষ্ট্ৰীয় নিৰাপত্তাৰ স্বাৰ্থত দলীয় ৰাজনীতিৰ ঊৰ্ধ্বত গৈ এই ব্যক্তিগৰাকীক এনে স্পৰ্শকাতৰ আৰু কৌশলপূৰ্ণ এছাইনমেণ্টত অন্তৰ্ভুক্ত নকৰিব।”
