শিলাবৃষ্টিৰ লগতে ধুমুহাৰ বাবে দেশৰ ৰাজধানীৰ বিস্তৃত অংশ প্ৰাকৃতিক দুৰ্যোগৰ ফলত বিধ্বস্ত হৈ পৰিছে। প্ৰচণ্ড গৰমৰ পিছত বুধবাৰৰ সন্ধিয়াৰ পৰা দিল্লী আৰু কাষৰীয়া অঞ্চলত বৰষুণ আৰম্ভ হয় (Delhi Storm)। ধুমুহা আৰু শিলাবৃষ্টিও আৰম্ভ হয়। ধুমুহাৰ ফলত লোধি পথ এলেকাত বিদ্যুতৰ খুঁটা এটা ভাঙি পৰাত এজন বিশেষভাৱে সক্ষম ব্যক্তিৰ মৃত্যু হয়।
উত্তৰ-পূব দিল্লীৰ গোকুলপুৰীত মূৰত গছ পৰি মৃত্যু হয় এজন ২২ বছৰীয়া যুৱকৰ। বুধবাৰৰ নিশালৈকে দিল্লীৰ বিভিন্ন অঞ্চলৰ পৰা কমেও ১১জন লোক আহত হোৱাৰ খবৰ পোৱা গৈছে। অভাৰব্ৰিজৰ লোহাৰ অংশ ভাঙি পৰাৰ ফলত কোনোবা আহত হোৱাৰ বিপৰীতে ওখ ঠাইৰ কাঁচ ভঙাৰ ফলত আন কোনোবা আহত হৈছে।
এই দুৰ্যোগৰ বাবে দিল্লী বিমানবন্দৰৰ সেৱাও ব্যাহত হৈ পৰে। দিল্লীত অৱতৰণ কৰিব নোৱাৰিলে কমেও ১৩খন বিমান। অৱশ্যে সেইবোৰ আন ঠাইত অৱতৰণ কৰোৱা হয়। সূত্ৰৰ উদ্ধৃতি দি সংবাদ সংস্থা পিটিআয়ে প্ৰকাশ কৰা অনুসৰি, ১২খন বিমান ৰাজস্থানৰ জয়পুৰ বিমানবন্দৰত অৱতৰণ কৰা হৈছে।
দিল্লী অভিমুখী এখন আন্তঃৰাষ্ট্ৰীয় বিমান মুম্বাই বিমানবন্দৰত অৱতৰণ কৰে। ইয়াৰ বাহিৰেও কম সময়ৰ ভিতৰতে হোৱা ধাৰাসাৰ বৰষুণৰ বাবে দিল্লীৰ বিভিন্ন পথত পানী জমা হয়। যান-জঁটৰ সৃষ্টি হয়। দিল্লী আৰক্ষীয়ে দিল্লীবাসীক সময় হাতত লৈ ৰাজপথলৈ ওলাই আহিবলৈ পৰামৰ্শ দিয়ে।
দুৰ্যোগ আৰম্ভ হোৱাৰ পিছতে দিল্লী বিদ্যুৎ বিতৰণ কোম্পানীয়ে ৰাজধানীৰ কিছু অংশত বিদ্যুৎ সেৱা বন্ধ কৰি দিয়ে। সংস্থাটোৱে কয় যে বিদ্যুৎস্পৃষ্টৰ ফলত হোৱা দুৰ্ঘটনা ৰোধৰ বাবে এই সতৰ্কতামূলক ব্যৱস্থা গ্হৰণ কৰা হৈছে। আনহাতে, শিলাবৃষ্টি আৰু ধুমুহাৰ ফলত দিল্লী মেট্ৰ’ৰ অভাৰহেড লাইন ক্ষতিগ্ৰস্ত হয়। কিছুসময়ৰ বাবে ৰাজধানীত মেট্ৰ’ সেৱা ব্যাহত হয়।
বুধবাৰে সন্ধিয়া ৫.৩০ বজাৰ পৰা ৮.৩০ বজালৈ চফদৰজঙত ১২.২ মিলিমিটাৰ বৰষুণ হয়। প্ৰতি ঘণ্টাত ৬০ৰ পৰা ৭০ কিলোমিটাৰ বেগেৰে ধুমুহা বলে।
