কাৰবি আংলং জিলাৰ খেৰণি আৰু হাওৰাঘাটৰ ৰংকুট এলেকাত থকা PGR-VGR ৰ ভূমিৰ পৰা বেদখলকাৰীক উচ্ছেদ কৰাৰ দাবী দুটা বছৰ জুৰি কাৰবি আংলঙৰ বিভিন্ন যুৱ-ছাত্ৰ সংগঠনে আন্দোলন কৰি আহিছে ৷খেৰণিৰ ভূমিত বিহাৰী সম্প্ৰদায়ৰ আৰু হাওৰাঘাটৰ ভূমিত বঙালী সম্প্ৰদায়ৰ লোকে বসবাস কৰি আহিছে ৷
কাৰবি আংলং স্বায়ত্ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং নিজে গৈ খেৰণিৰ ভূমিত উচ্ছেদৰ খুটি মাৰিছিল ৷ পিছে সিমানতে সকলো সামৰণি পৰিল ৷ ইয়াৰ পিছতো যুৱ নেতা লিৎচন ৰংফাৰৰ নেতৃত্বত KSA / KSYC কে ধৰি বহুকেইটা সংগঠনে PGR-VGR ভূমিত উচ্ছেদ চলাবলৈ মুখ্যমন্ত্ৰী ; জিলা প্ৰশাসন আৰু পৰিষদক স্মাৰকপত্ৰ দি অহাৰ লগতে প্ৰতিবাদী কাৰ্যসূচী পালন কৰি আহিছে ৷
ইয়াৰ মাজতে লিৎচন ৰংফাৰৰ নেতৃত্বত এটি দলে ঘৰে ঘৰে গৈ হাওৰাঘাটৰ ৰংকুটত বসবাস কৰা বঙালী লোক সকলৰ মাটিৰ পট্ৰা আৰু অনান্য নথি পত্ৰ পৰীক্ষা কৰে ৷
ইয়াৰ পিছতে বঙালী যুৱ ছাত্ৰ ফেডাৰেচনৰ কেন্দ্ৰীয় সমিতিৰ সভাপতি দীপক দে আহি হাওৰাঘাটত সভা পাতি বিজেপি চৰকাৰৰ বিৰুদ্ধে হুংকাৰ দিয়ে ৷ তেওঁ আনকি ইচ্ছা কৰিলেই পৰিষদৰ মুখ্য কাৰ্যবাহী সদস্য তুলিৰাম ৰংহাঙক ইচ্ছা কৰিলেই নমাব পৰে বুলি কয় ৷ এই মন্তব্যৰ পিছতে উত্তপ্ত হৈ পৰে পাহাৰৰ ৰাজনীতি ৷
KSA য়ে বৃহৎ প্ৰতিবাদী সমদল কৰি কাৰবি আংলং জিলাত বসবাস কৰা অজনজাতি লোক সকলৰ মাটিৰ পট্ৰা বাতিল কৰাৰ দাবী কৰে ৷ ইয়াৰ সমান্তৰালকৈ হাওৰাঘাটত বঙালী যুৱ ছাত্ৰ ফেডাৰেচনে জোঁৰ সমদল কৰি মাটিৰ অধিকাৰ বিচৰাৰ লগতে বিজেপি চৰকাৰক সৰ্তকবাণী শুনায় ৷
এই ঘটনাক্ৰমৰ মাজতে আজি পুৱা হাওৰাঘাট থালাৰ ২০/২০২৫ নম্বৰৰ গোচৰৰ অধীনত ভাৰতীয় ন্যায় সংহিতাৰ ৬১(২)/৩৫১(৩)/১১৩(৫)/৩(৫) ধাৰাত লিৎচন ৰংফাৰক গ্ৰেপ্তাৰ কৰে ৷বৰ্তমান ডিফু ন্যায়িক আদালতত লিৎচন ৰংফাৰক হাজিৰ কৰা হৈছে আৰু আদালতৰ বাহিৰত তেওঁৰ সমৰ্থক সকলে বাহিৰত ধৰ্না দি পৰিস্থিতি উত্তপ্ত কৰি আছে ৷
