জুবিন গাৰ্গৰ (Zubeen Garg) মৃত্যুৰ তদন্তত নিয়োজিত হৈ আছে অসম আৰক্ষীৰ চি আই ডি আৰু বিশেষ তদন্তকাৰী দল। ইতিমধ্যে দুয়োটা তদন্তকাৰী গোটে তদন্ত প্ৰক্ৰিয়া ক্ষিপ্ৰ গতিত আগবঢ়াই নিছে। ইয়াৰ মাজতে অসম আৰক্ষীয়ে ঘোষণা কৰিছে যে জুবিনৰ মৃত্যুৰ তদন্তৰ বাবে ছিংগাপুৰলৈ যাব এছ আই টিৰ এটা দুজনীয়া দল।
এইবাৰ জুবিন গাৰ্গৰ মৃত্যুৰ তদন্তত ছিংগাপুৰ চৰকাৰৰ সহযোগিতা বিচাৰিলে অসম চৰকাৰে। ইয়াৰ বাবে গৃহ মন্ত্ৰালয়লৈ পত্ৰ প্ৰেৰণ কৰিছে অসম চৰকাৰে৷ এই কথা সদৰী কৰিছে মুখ্যমন্ত্ৰী হিমন্ত বিশ্ব শৰ্মাই ।
সামাজিক মাধ্যমত কৰা এক পোষ্টত মুখ্যমন্ত্ৰীয়ে উল্লেখ কৰিছে, “আমাৰ মৰমৰ জুবিনৰ দুৰ্ভাগ্যজনক বিয়োগৰ পৰিপ্ৰেক্ষিতত ছিংগাপুৰৰ সৈতে পাৰস্পৰিক আইনী সহায়তা চুক্তি (এম এল এ টি)ৰ আহ্বান কৰিবলৈ ইতিমধ্যে অসম চৰকাৰে কেন্দ্ৰীয় গৃহ মন্ত্ৰ্যালয়ক আনুষ্ঠানিকভাৱে আবেদন জনাইছে।
এবাৰ আহ্বানৰ পাছত ই আমাক সম্পূৰ্ণ গোচৰটোৰ তদন্তৰ ক্ষেত্ৰত সবিশেষ তথ্য প্ৰদানৰ লগতে অভিযুক্তক ওভতাই অনা আৰু ন্যায় প্ৰদান নিশ্চিত কৰাৰ বাবে ছিংগাপুৰৰ কৰ্তৃপক্ষৰ পৰা সম্পূৰ্ণ সহযোগিতা সুনিশ্চিত কৰিব৷”উল্লেখ্য যে মঙলবাৰে অসম আৰক্ষীৰ দুজন উচ্চপদস্থ বিষয়া জুবিন গাৰ্গৰ মৃত্যুৰ গোচৰৰ তদন্তৰ বাবে ছিংগাপুৰলৈ যাব৷
