ৰিহাবাৰীত চেইন থপিয়াই নি ধাৰাপুৰত গোল্ড লোণ লৈছিল চিলনী চোৰ বিৰুল হুছেইনে। মহানগৰ আৰক্ষীৰ মূৰৰ কামোৰণি আছিল চিলনী চোৰটো। মহানগৰীৰ বিভিন্ন থানাত একাধিক চেইন থপিয়াই নিয়াৰ গোচৰ বিৰুলৰ বিৰুদ্ধে।
পূৰ্বেও ১২ বাৰকৈ জেইল গৈয়ো সংশোধন নহল কুখ্যাত চোৰটোৰ চৰিত্ৰ। পল্টনবজাৰ আৰক্ষীয়ে দক্ষিণ শৰণীয়াৰ পৰা গ্ৰেপ্তাৰ কৰে বিৰুলক। সোমাবাৰে পুৱা ৰিহাবাৰীৰ এগৰাকী মহিলাৰ ডিঙিৰ সোণৰ চেইন থপিয়াই নিছিল বিৰুলে।
ভুক্তভোগী মহিলাগৰাকীয়ে ঘটনাক লৈ পল্টনবজাৰ থানাত দাখিল কৰিছিল এজাহাৰ। আৰক্ষীয়ে CCTV VISUALS নিৰীক্ষণ কৰি গ্ৰেপ্তাৰ কৰে বিৰুলক। বিৰুলৰ স্বীকাৰোক্তিত আৰক্ষীয়ে ফাইনেন্স কোম্পানীটোৰ পৰা উদ্ধাৰ কৰে মহিলা গৰাকীৰ চেইন ডাল। ফাইনেন্স কোম্পানীটোত চেইনডাল দি গোল্ড লোণ লৈছিল বিৰুলে।
ইফালে বিৰুলৰ স্বীকাৰোক্তিত আন এজন গহনা ব্যৱসায়ীক গ্ৰেপ্তাৰ। হাজোৰ পৰা সোনাৰী ৰাইজুদ্দিনক গ্ৰেপ্তাৰ কৰে আৰক্ষীয়ে। পূৰ্বে গুৱাহাটীত চুৰি কৰা সোণৰ সামগ্ৰী সোণাৰী ৰাইজুদ্দীনক বিক্ৰী কৰি আহিছিল বিৰুলে। একেসময়তে বিৰুলৰ হাজোৰ বায়েকৰ ঘৰতো অভিযান চলাই পল্টন বজাৰ আৰক্ষীয়ে। বিৰুলৰ চুৰি ঘটনাৰে জড়িত ভিনীয়েকে নুৰ মহম্মদকো গ্ৰেপ্তাৰ কৰে আৰক্ষীয়ে।
কুখ্যাত চোৰৰ দলটোৰ পৰা আৰক্ষীয়ে উদ্ধাৰ কৰে বহু পৰিমাণৰ সোণৰ আ-অলংকাৰ । লগতে চুৰি কাৰ্যত ব্যৱহাৰ কৰা এখন চুৰি স্কুটিও জব্দ কৰে আৰক্ষীয়ে।
