“আপোনালোকে সাংবাদিক হিচাপে সকলো বাধা বিঘিনিৰ মাজেদি সংবাদ সংগ্ৰহ কৰি আছে, জুবিনৰ স্মৃতি ৰক্ষাৰ বাবে বহুতেই প্ৰতিমূৰ্ত্তি নিৰ্মাণ কৰি আছে, চৰকাৰেও সকলো আলোচনা সমালোচনা একাষৰীয়া কৰি জুবিনৰ ন্যায়ৰ বাবে কৰিয়েই আছে।”
আজি সন্ধিয়া বোকাখাতত উপস্থিত হোৱা কেন্দ্ৰীয় মন্ত্ৰী পৱিত্ৰ মাৰ্ঘেৰিটাই সাংবাদিকৰে হোৱা মত বিনিময়ত এইদৰে কয়।
জুবিন গাৰ্গৰ ৰহস্যজনক মৃত্যুৰ তদন্ত ত্বৰান্বিত হোৱা বুলি উল্লেখ কৰি মাৰ্ঘেৰিটাই কয় যে আমাৰ তদন্তকাৰী বিষয়া চিংগাপুৰত উপস্থিত হৈ তদন্ত অব্যাহত ৰাখিছে। অতি কম দিনৰ ভিতৰত তদন্তৰ প্ৰক্ৰিয়া সমাপ্ত হ’ব বুলিও মন্তব্য কৰিছে।
কংগ্ৰেছৰ প্ৰসংগ উল্লেখ কৰি কেন্দ্ৰীয় মন্ত্ৰী গৰাকীয়ে কয় যে দলৰ সভাপতি গৌৰৱ গগৈয়ে জুবিন গাৰ্গক লৈ ৰাজনীতি কৰিছে। দিল্লী বিমান বন্দৰত মাৰ্ঘেৰিটাই জুবিন গাৰ্গৰ নশ্বৰ দেহত জোতা পিন্ধি শ্ৰদ্ধাঞ্জলি জনোৱা বুলি যি দৃশ্য সামাজিক মাধ্যমত প্ৰচাৰ চলাইছে সেয়া সত্য নহয় বুলিও স্পষ্ট কৰে।
জুবিনৰ সমাধি ক্ষেত্ৰত মাৰ্ঘেৰিটাই “মায়াবিনী” গীত পৰিৱেশন নকৰাৰ সন্দৰ্ভত কয় যে,আপোন বন্ধুজন যেতিয়া চিৰ নিদ্ৰাত, তেতিয়া কেনেকৈ গীত গাব পাৰি। সকলোৰে দুখ প্ৰকাশৰ ধৰণ সুকীয়া।
জুবিনৰ আন অনুৰাগীৰ দৰে তেওঁও আমৃত্যু বুকুত কঢ়িয়াব জুবিনক হেৰুওৱা যন্ত্ৰণাৰ বিষ। আনহাতে বাক্সাৰ ঘটনাত তৃতীয় পক্ষৰ পূৰ্ণ হাত আছে বুলি মত পোষণ কৰে। তৃতীয় পক্ষ কোন সেয়া সকলোৱে বুজিছে।ভুৱা জুবিন অনুৰাগীয়ে এই কাৰ্যত উদগনি যোগাইছিল বুলিও কয় মাৰ্ঘেৰিটাই।
