দুদিনীয়া অসম ভ্ৰমণৰ কাৰ্যসূচীৰে শনিবাৰে গুৱাহাটীত উপস্থিত হৈছে প্ৰধানমন্ত্ৰী নৰেন্দ্ৰ মোদী (Narendra Modi) । প্ৰধানমন্ত্ৰীয়ে গুৱাহাটী বিমানবন্দৰত অৱতৰণ কৰিয়ে বিমানবন্দৰ চৌহদত স্থাপন কৰা অসমৰ প্ৰথম মুখ্যমন্ত্ৰী লোকপ্ৰিয় গোপীনাথ বৰদলৈৰ ৮০ ফুট উচ্চতাৰ প্ৰতিমূৰ্তি উন্মোচন কৰিব।
ইয়াৰ পিছত নৱনিৰ্মিতি লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমানবন্দৰৰ নতুন টাৰ্মিনেলটো উদ্বোধন কৰিব। উল্লেখ্য যে আদানি গ্ৰুপৰ দ্বাৰা পৰিচালিত এই বিমানবন্দৰৰ নতুন টাৰ্মিনেলটো আকৰ্ষণীয় ৰূপত নিৰ্মাণ কৰা হৈছে।
প্ৰকৃতিক বিষয়বস্তু হিচাপে লৈ নিৰ্মাণ কৰা টাৰ্মিনেলটোত ব্যৱহাৰ কৰা হৈছে প্ৰাকৃতিক উপাদানো। প্ৰায় ৫ হাজাৰ কোটি ব্যয়সাপেক্ষে নিৰ্মাণ কৰি উলিওৱা এই বিমানবন্দৰ টাৰ্মিনেলটো দেশৰ ভিতৰতে এনেধৰণৰ প্ৰথমটো টাৰ্মিনেল। অসমৰ বাঁহেৰে আৰু কপৌফুলৰ আর্হিত নিৰ্মাণ কৰা এইটো হৈছে দেশৰ প্ৰথমটো প্ৰাকৃতিক শোভাৰ সুশোভিত টাৰ্মিনেল।
এই টাৰ্মিনেলটো নিৰ্মাণত উত্তৰ-পূৰ্বাঞ্চলৰ বিভিন্ন ৰাজ্যৰ পৰা অনা প্ৰায় ১৪০ টন বাঁহ ব্যৱহাৰ কৰা হৈছে। আনহাতে, কপৌফুলৰ আৰ্হিত টাৰ্মিনেলটোত নিৰ্মাণ কৰা হৈছে ৫৭ টা স্তম্ভ। প্রায় ১.৪০ লাখ বর্গমিটাৰ এলেকাজুৰি নির্মাণ কৰা অত্যাধুনিক টার্মিনেলটোত ১ লাখ বিভিন্ন গছপুলি ৰোপণ কৰা হৈছে।
মুকলি হোৱাৰ পিছত নতুন টাৰ্মিনেলটোৰ পৰা বছৰি ৬৬ লাখৰ পৰা ১.৩ কোটি যাত্ৰীৰ আগমন ঘটিব বুলি বিমানবন্দৰ প্ৰধাকাৰীৰ পৰা জনোৱা হৈছে। উল্লেখ্য যে এই নতুন টাৰ্মিনেলটো মুকলি হোৱাৰ পিছত বিমানবন্দৰৰ পুৰণি টাৰ্মিনেলটো বন্ধ কৰি দিয়া হ’ব।
