সমাগত বিধানসভা নিৰ্বাচন। মাজত দুটী মাহৰো সময় কম। তেনে ক্ষেত্ৰত শাসক-বিৰোধী উভয়ে নিৰ্বাচনৰ বাবে কঁকালত টঙালি বান্ধিছে। অৱশ্যে বিৰোধী দলবোৰৰ তুলনাত শাসকীয় বিজেপি এই ক্ষেত্ৰত আগবাঢ়ি আছে। ইতিমধ্যে বিজেপিয়ে বিধানসভা নিৰ্বাচনৰ বাবে আনুষ্ঠানিকভাৱে প্ৰচাৰ কাৰ্যসূচী আৰম্ভ কৰিছে।
তাৰে অংশ হিচাপে বিজেপিয়ে গ্ৰহণ কৰিছে এক ব্যতিক্ৰমী কাৰ্যসূচী। এইবাৰ নিৰ্বাচনৰ পূৰ্বে দেৱালত পদুম ফুলোৱাৰ এক কাৰ্যসূচী গ্ৰহণ কৰা হৈছে। অৰ্থাৎ অসমৰ ইমূৰৰ পৰা সিমূৰলৈ দেৱালে দেৱালে বিজেপি (BJP)ৰ প্ৰতীক পদুম ফুলৰ ছবি অংকন (Wall painting drive) আৰু বিভিন্ন ঘৰণৰ শ্লোগান লিখি নিৰ্বাচনী প্ৰচাৰ চলোৱাৰ কাৰ্যসূচী গ্ৰহণ কৰিছে। এই কাৰ্যসূচীৰ সোমবাৰে আনুষ্ঠানিকভাৱে শুভাৰম্ভণি কৰে মুখ্যমন্ত্ৰী ডঃ হিমন্ত বিশ্ব শৰ্মা (Inauguration by Chief Minister Dr Himanta Biswa Sharma)ই।
সোমবাৰৰ পৰা আৰম্ভ হোৱা বিজেপিৰ ৰাজ্যজুৰি দেৱাল লিখন কাৰ্যসূচী গুৱাহাটীৰ খানাপাৰাত ৰাজ্যিক বিজেপিৰ সভাপতি দিলীপ শইকীয়াৰ উপস্থিতিত মুখ্যমন্ত্ৰীয়ে শুভাৰম্ভ কৰে। লগতে উপস্থিত থাকে জ্যেষ্ঠ বিধায়ক অতুল বৰাৰ লগতে বিজেপিৰ আন কেইবাগৰাকী কাৰ্যকৰ্তা। এই দেৱাল লিখন কাৰ্যসূচী শুভাৰম্ভ কৰি মুখ্যমন্ত্ৰীয়ে কয় যে নিৰ্বাচনৰ বাবে বিজেপি সম্পূৰ্ণৰূপে সাজু হৈছে আৰু এই দেৱাল লিখন কাৰ্যসূচী আজিৰে পৰা সমগ্ৰ অসমতেই আৰম্ভ হৈছে। বিজেপিৰ কাৰ্যকৰ্তাসকলৰ উপৰি মন্ত্ৰী-বিধায়কসকলেও বিভিন্ন স্থানত এই কাৰ্যসূচীত অংশগ্ৰহণ কৰিব। ইয়াৰ বাবে আগতীয়াকৈ দেৱালৰ গৰাকীৰ পৰা অনুমতি লোৱা হ’ব। তেওঁলোকৰ অনুমতি সাপেক্ষেহে দেৱালত লিখা কাম কৰা হ’ব। ইয়াৰ দ্বাৰা এক প্ৰকাৰে গণসংযোগ স্থাপনৰ লগতে প্ৰচাৰো হ’ব। দেৱালত বিজেপিৰ প্ৰতীকৰ উপৰি বিগত দহ বছৰৰ বিজেপি চৰকাৰৰ কামৰ খতিয়ান দাঙি ধৰা হ’ব। ‘অসমৰ সুৰক্ষা, বিজেপিৰ প্ৰতিজ্ঞা’, ‘বিকশিত অসম, জয় আই অসম’, ‘বিজেপিৰ পণ, বন্দে মাতৰম’ আদি কেইবাটাও শ্লোগান দেৱাল লিখনৰ বাবে লোৱা হৈছে।
এই সন্দৰ্ভত মুখ্যমন্ত্ৰীয়ে কয়, “সমাগত বিধান সভা নিৰ্বাচনত ভাৰতীয় জনতা পাৰ্টিৰ বিজয় সুনিশ্চিত কৰাৰ বাবে আমি প্ৰচাৰ অভিযান আৰম্ভ কৰিছোঁ৷ দলৰ প্ৰচাৰৰ বাবে আজিৰে পৰা দেৱাল লিখন আৰম্ভ হৈছে৷ অসমজুৰি দেৱালত ফুলি উঠিব পদুম৷ আজি গুৱাহাটীৰ খানাপাৰাত দলৰ মাননীয় ৰাজ্যিক সভাপতি শ্ৰীদিলীপ শইকীয়া ডাঙৰীয়া আৰু শতাধিক কাৰ্যকৰ্তাৰ উপস্থিতিত দলৰ প্ৰতীক চিহ্ন পদুম ফুলৰ ছবি অংকনেৰে দেৱাল লেখন কাৰ্যসূচীৰ শুভাৰম্ভ কৰোঁ৷”
