ছিংগাপুৰ (Singapore) অভিমুখী এয়াৰ ইণ্ডিয়া (Air India)ৰ এখন বিমানে দিল্লীত জৰুৰীকালীন অৱতৰণ (Emergency landing in Delhi) কৰে। মাজ আকাশত থকাৰ সময়তে বিমানখনত কাৰিকৰী বিজুতিৰ সৃষ্টি হয়। উৰণৰ কিছু সময়ৰ পিছতে এই ত্ৰুটি ধৰা পৰাত বিমানখনৰ পথ পৰিৱৰ্তন কৰি নিৰাপদে দিল্লীত অৱতৰণ কৰে। জানিব পৰা মতে, বিমানখনত ১৯০ জন যাত্ৰী আছিল আৰু সকলো নিৰাপদ।
সংবাদ সংস্থা পি টি আয়ে প্ৰকাশ কৰা অনুসৰি, এয়াৰ ইণ্ডিয়াৰ বিমান এ আই ২৩৮০ ৰাণৱে এৰি যোৱাৰ কিছু সময়ৰ পিছতে সহায়ক শক্তি ইউনিটত (এ পি ইউ) অগ্নিকাণ্ডৰ সংকেত ধৰা পৰে। লগে লগে বিমানৰ ক্ৰুক সতৰ্ক কৰি দিয়া হয়।
পাইলটে জৰুৰীকালীন অৱতৰণৰ বাবে অনুমতি বিচাৰে। এয়াৰ ট্ৰেফিক কণ্ট্ৰ’লৰ পৰা সেউজ সংকেত পোৱাৰ পিছত পাইলটে বিমানখন ঘূৰাই দিল্লীলৈ আনে। ইয়াৰ পিছত বিমানখন নিৰাপদে অৱতৰণ কৰে। অৱশ্যে বিমানখন উৰণৰ পিছত প্ৰায় এঘণ্টা ধৰি আকাশত আছিল বুলি কোৱা হৈছে।
এয়াৰ ইণ্ডিয়াৰ এগৰাকী মুখপাত্ৰই এই ঘটনা স্বীকাৰ কৰি কয় যে পাইলট আৰু কেবিন ক্ৰুৱে বিমানখন নিৰাপদে নমাই আনিবলৈ সক্ষম হয়। তেওঁ কয়, “বিমানখন নিৰাপদে দিল্লীত অৱতৰণ কৰিলে। আমাৰ গ্ৰাউণ্ড ষ্টাফে প্ৰয়োজনীয় পদক্ষেপ গ্ৰহণ কৰিলে। যাত্ৰীসকলক নিৰাপদে নমাই দিয়া হয়। তেওঁলোকক ছিংগাপুৰলৈ আন এখন বিমানত উঠাই দিয়া হৈছে।” অৱশ্যে কাৰিকৰী বিজুতি আৰু যাত্ৰীসকলৰ অসুবিধাৰ বাবে দুখ প্ৰকাশ কৰে বিমান সংস্থাটোৰ মুখপাত্ৰই। জানিব পৰা মতে, পুৱা প্ৰায় ১ বজাত ছিংগাপুৰলৈ উৰা মাৰিছিল বিমানখন।
