ককৰোচ জনতা পাৰ্টীৰ দুই নেতা (CJP leaders) আশুতোষ ৰাংকা (Ashutosh Ranka) আৰু সৌৰভ দাসক (Sourav Das) ন্যায়িক জিম্মালৈ প্ৰেৰণ (Send to the Judicial coustody) কৰে দণ্ডাধীশে। বুধবাৰে পুৱা ৮ বজাত মাৰ্গ মন্দিৰ থানাত দণ্ডাধীশৰ সন্মুখত হাজিৰ কৰোৱা হয় দুয়োকে। অধিবক্তাসকলৰ যুক্তিৰ পিছত আশুতোষ আৰু সৌৰভক পাঁচ দিনৰ কাৰাগাৰলৈ প্ৰেৰণ কৰাৰ নিৰ্দেশ দিয়া হয়। আনহাতে, ধৃত আজিংক্য শিণ্ডেক মুকলি কৰি দিয়া হৈছে। সূত্ৰৰ পৰা জানিব পৰা মতে, শান্তি বিঘ্নিত নকৰাৰ চৰ্তত বণ্ড স্বাক্ষৰ কৰি আজিংক্যক মুকলি কৰি দিয়া হয়।
চিজেপিৰ অধিবক্তা অভিষ্ট হেলাই কয় যে দিল্লী আৰক্ষীয়ে দণ্ডাধীশৰ আগত যুক্তি দিছিল যে আশুতোষ আৰু সৌৰভে ফোন কৰি যন্তৰ-মন্তৰত মানুহ গোটাইছিল। ইয়াৰ পিছত সকলোৱে অবৈধভাৱে যন্তৰ-মন্তৰত প্ৰৱেশ কৰে। দিল্লী আৰক্ষীয়েও দণ্ডাধীশৰ সন্মুখত যুক্তি আগবঢ়ায় যে যদি তেওঁলোকক মুকলি কৰি দিয়া হয় তেন্তে তেওঁলোকে পুনৰ অপৰাধমূলক কাৰ্য সংঘটিত কৰিব পাৰে। আশুতোষ আৰু সৌৰভক জে’ললৈ প্ৰেৰণৰ নিৰ্দেশক লৈ প্ৰশ্ন উত্থাপন কৰে চিজেপিৰ মুৰব্বী অভিজিত দীপকেয়ে। তেওঁৰ প্ৰশ্ন, “তেওঁলোকৰ অপৰাধ কি? যন্তৰ-মন্তৰত ত্ৰিৰংগ উত্তোলন কৰিলে ?”
ইয়াৰ পিছতে প্ৰধানমন্ত্ৰী নৰেন্দ্ৰ মোদীক প্ৰত্যাহ্বান জনাই দীপকেয়ে কয়, “কিছু সাহস দেখুৱাওক। যদি আপুনি এইদৰে মত দমন কৰিবলৈ বদ্ধপৰিকৰ, তেন্তে কাপুৰুষৰ কৌশলৰ আঁৰত লুকাই নাথাকি জৰুৰীকালীন অৱস্থা ঘোষণা কৰক।” লোকসভাৰ বিৰোধী দলৰ নেতা তথা কংগ্ৰেছ নেতা ৰাহুল গান্ধীয়েও চৰকাৰৰ বিৰুদ্ধে “কাপুৰুষালি আচৰণ”ৰ অভিযোগ উত্থাপন কৰিছে। নাম নোলোৱাকৈয়ে তেওঁ চিজেপিৰ কাষত থিয় দি দাবী কৰে, “বেনাৰবোৰ বেলেগ হ’ব পাৰে, কিন্তু লক্ষ্য একে। সকলো প্ৰতিবাদ আচলতে এটা দাবীৰ বাবে- নাগৰিকৰ সাংবিধানিক অধিকাৰ পুনৰ ঘূৰাই অনা।”
উল্লেখ্য যে মঙলবাৰে নিশা এই ঘটনাত সৌৰভ, আশুতোষ, আজিংক্যসহ ১৪ জন লোকক গ্ৰেপ্তাৰ কৰা বুলি জানিব পৰা গৈছে। অৱশ্যে বুধবাৰে পুৱা চিজেপিৰ আইনী পৰিক্ৰমা মুৰব্বী ৰত্না সিঙে সৌৰভ, আশুতোষ আৰু আজিংক্যক গ্ৰেপ্তাৰ কৰি পাৰ্লিয়ামেণ্ট ষ্ট্ৰীট থানালৈ লৈ যোৱা বুলি জানিবলৈ দিয়ে। অৱশ্যে পিছত দিল্লী আৰক্ষীয়ে এই গ্ৰেপ্তাৰ প্ৰতিৰোধমূলক ব্যৱস্থা বুলি কয়।
চৰকাৰী কৰ্মচাৰীৰ কাম-কাজত বাধা দিয়াৰ অভিযোগ উত্থাপন হৈছে চিজেপিৰ তিনিগৰাকী শীৰ্ষ নেতাৰ বিৰুদ্ধে। তদুপৰি আৰক্ষীয়ে সৌৰভ আৰু আশুতোষক বণ্ডৰ চৰ্ত উলংঘা কৰাৰ অভিযোগ উত্থাপন কৰিছে। বুধবাৰে মাৰ্গ মন্দিৰ থানাত দণ্ডাধীশৰ সন্মুখত হাজিৰ হোৱাৰ সময়ত তেওঁলোকক পাঁচ দিনৰ ন্যায়িক জিম্মালৈ প্ৰেৰণ কৰাৰ নিৰ্দেশ দিয়া হয়।
উল্লেখ্য যে ইয়াৰ পূৰ্বে শনিবাৰে (১০ অক্টোবৰ) দিল্লী আৰক্ষীয়ে দিল্লী বিমানবন্দৰত অৱতৰণ কৰাৰ পিছত দীপকে-ৰাংকা-সৌৰভক ‘প্ৰতিৰোধমূলক গ্ৰেপ্তাৰ’ কৰিছিল। এবছৰৰ বাবে ‘শান্তি বজাই ৰখা’ৰ চৰ্তত আদালতৰ পৰা জামিন লাভ কৰিছিল তেওঁলোকে। দুদিন পিছত পুনৰ ‘নিষিদ্ধ’ যন্তৰ-মন্তৰত প্ৰৱেশ কৰে। সেইবাৰ সৌৰভ আৰু আশুতোষে জামিন পাইছিল যদিও এইবাৰ জে’ললৈ যাবলগা হ’ল।
