এফালে হিংসাত্মক গণ প্ৰতিবাদ (Iran Mass protest), আনফালে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ ‘সামৰিক ব্যৱস্থা’ৰ ভাবুকি (Threat of ‘military action’)। এনে এক অনিশ্চয়তাৰ পৰিবেশত প্ৰধানমন্ত্ৰী নৰেন্দ্ৰ মোদীৰ চৰকাৰে সকলো ভাৰতীয়ক ইৰাণৰ পৰা ঘূৰাই অনাৰ ক্ষেত্ৰত সক্ৰিয় হৈ পৰিছে। বৈদেশিক পৰিক্ৰমা মন্ত্ৰালয়ে বৃহস্পতিবাৰে কেন্দ্ৰৰ এই পদক্ষেপৰ কথা ঘোষণা কৰে। তদুপৰি নতুন দিল্লীয়ে ইজৰাইলত বসবাস কৰা ভাৰতীয়সকলকো ইৰাণী সেনাৰ আক্ৰমণৰ সম্ভাৱনা সন্দৰ্ভত সকীয়াই দিছে।
সংবাদ সংস্থা পি টি আয়ে প্রকাশ কৰা অনুসৰি, যেনেকৈ বিগত সময়ত উপসাগৰীয় যুদ্ধ, ৰাছিয়া-ইউক্রেইন যুদ্ধ আৰু আফগান গৃহযুদ্ধৰ সময়ত আবদ্ধ ভাৰতীয়ক বিশেষ বিমানৰ সহায়ত বায়ুসেনাই ‘এয়াৰলিফ্ট’ কৰিছিল, ঠিক তেনেদৰে ইৰাণতো কেন্দ্রই একেই কথা বিবেচনা কৰি আছে৷ এই ক্ষেত্ৰত চৰকাৰে অসামৰিক আৰু সামৰিক পৰিবহণ বিমান ব্যৱহাৰৰ বিকল্পও অন্বেষণ কৰিছে। কেন্দ্ৰই অনুমান কৰিছে যে বৰ্তমান ইৰাণত ছাত্ৰ-ছাত্ৰীকে ধৰি ১০ হাজাৰৰো অধিক ভাৰতীয় আছে।
বৈদেশিক পৰিক্ৰমা মন্ত্ৰালয়ে চলিত বৰ্ষত ইৰাণত থকা ভাৰতীয় নাগৰিকসকলক দুটাকৈ পৰামৰ্শ জাৰি কৰিছে। পশ্চিম এছিয়াৰ দেশখনৰ শেহতীয়া পৰিস্থিতিৰ প্ৰতি লক্ষ্য ৰাখি ৫ জানুৱাৰীত নতুন দিল্লীয়ে প্ৰথমটো পৰামৰ্শ জাৰি কৰে। ন দিনৰ পাছত বুধবাৰে (১৪ জানুৱাৰী) বৈদেশিক পৰিক্ৰমা মন্ত্ৰালয়ৰ মুখপাত্ৰ ৰন্ধীৰ জয়ছোৱালে পুনৰ ইৰাণ সন্দৰ্ভত ভাৰতীয় নাগৰিকসকলক এক প্ৰেছ বিজ্ঞপ্তি জাৰি কৰে। তাত কোৱা হৈছে, “ইৰাণৰ শেহতীয়া পৰিস্থিতিৰ প্ৰতি লক্ষ্য ৰাখি ভাৰতীয় নাগৰিকসকলক পুনৰ পৰামৰ্শ দিয়া হৈছে যে এই সন্দৰ্ভত পৰৱৰ্তী জাননী নিদিয়ালৈকে দেশখনলৈ নাযাব। আপোনালোকক ৫ জানুৱাৰীৰ বৈদেশিক পৰিক্ৰমা মন্ত্ৰালয়ৰ পৰামৰ্শও চাবলৈ অনুৰোধ কৰা হৈছে।”
একে সময়তে ইৰাণত থকা ভাৰতীয় দূতাবাসৰ পৰাও সতৰ্কবাণী জাৰি কৰা হৈছে। বৰ্তমান ইৰাণত থকাসকলক পাঁচ পৰ্যায়ৰ পৰামৰ্শ দিয়া হৈছে। তাত কোৱা হৈছে, “ভাৰতীয় নাগৰিকে যিকোনো প্ৰকাৰে তৎক্ষণাত ইৰাণ এৰি আহিব লাগে।” দূতাবাসে কয় যে ভাৰতীয়সকল যিকোনো উপলব্ধ যাতায়াতৰ মাধ্যমেৰে ঘৰলৈ উভতি আহিব লাগে। লগতে ভ্ৰমণ বা প্ৰব্ৰজন নথি-পত্ৰ, পাছপ’ৰ্ট, পৰিচয়-পত্ৰ সকলো সময়তে লগত ৰাখিবলৈ কোৱা হৈছে। পশ্চিম এছিয়াত পুনৰ উত্তেজনাৰ মাজতে বুধবাৰে ইৰাণৰ বৈদেশিক মন্ত্ৰী আব্বাছ আৰাঘচিয়ে বৈদেশিক পৰিক্ৰমা মন্ত্ৰী এছ জয়শংকৰক ফোন কৰে। এই আলোচনাৰ বিষয়ে অৱগত কৰি জয়শংকৰে বুধবাৰে এক্স-পোষ্টত লিখিছে, “ইৰাণৰ বৈদেশিক মন্ত্ৰী ছৈয়দ আব্বাছ আৰাঘচিৰ পৰা ফোন আহে। আমি ইৰাণ আৰু ইয়াৰ চৌপাশৰ পৰিস্থিতিৰ বিষয়ে আলোচনা কৰোঁ।”
