ঝাৰখণ্ড (Jharkhand)ৰ গিৰিধত দুগৰাকী জনজাতীয় ছোৱালী (Tribal girl)ক দলবদ্ধ ধৰ্ষণৰ (Gang rape) অভিযোগ। মঙলবাৰে আৰক্ষীয়ে এই সন্দৰ্ভত অৱগত কৰে।
আৰক্ষী সূত্ৰৰ মতে, দেওবাৰে নিশা হাৰাল্ডিৰ পিৰতাণ্ড থানা এলেকাত সংঘটিত হয় এই ঘটনা। গাঁৱৰ ওচৰতে এখন মেলা চলি আছিল। ছোৱালী দুজনী তালৈ গৈছিল। মেলা চাই দুয়ো একেলগে ঘূৰি আহিছিল। তেতিয়ালৈকে সন্ধিয়া হৈ গৈছিল। পাঁচ-ছয়জন অচিনাক্ত ব্যক্তিয়ে তেওঁলোকৰ পথ অৱৰোধ কৰে। অভিযোগ অনুসৰি, ইয়াৰ পিছত দুয়োকে বলপূৰ্বকভাৱে উঠাই লৈ যোৱা হয়। ভুক্তভোগীয়ে কয় যে তেওঁলোকে কিবা বুজি পোৱাৰ আগতেই অচিনাক্ত ব্যক্তিসকলে তেওঁলোকৰ মুখত হাতেৰে ধৰি দুয়োকে ওচৰৰ পথাৰ এখনলৈ লৈ গৈ দলবদ্ধ ধৰ্ষণ কৰে।
ঘটনাৰ পিছতে তাৰ পৰাই অভিযুক্তই পলায়ন কৰে। ছোৱালী দুজনী ঘৰলৈ উভতি আহি পিতৃ-মাতৃক এই বিষয়ে অৱগত কৰে। এই খবৰ বিয়পি পৰাৰ লগে লগে গাঁওখনত উত্তেজনাই বিৰাজ কৰে। এই তথ্য লাভ কৰাৰ পিছতে আৰক্ষীয়ে উক্ত স্থানত উপস্থিত হয়। হৰাল্ডি থানাৰ ভাৰপ্ৰাপ্ত বিষয়া দীপক কুমাৰে জানিবলৈ দিয়া মতে, ছোৱালী দুগৰাকীক উদ্ধাৰ কৰি চিকিৎসা পৰীক্ষাৰ বাবে চিকিৎসালয়লৈ লৈ যোৱা হয়। তেওঁলোকৰ বক্তব্যও লিপিবদ্ধ কৰা হৈছে।
আৰক্ষীৰ সূত্ৰ মতে, ছোৱালী দুগৰাকীৰ বক্তব্যৰ ভিত্তিত অভিযুক্তক চিনাক্তকৰণৰ কাম আৰম্ভ হৈছে। তেওঁলোকৰ পৰিয়ালৰ বক্তব্যৰ ভিত্তিত এফ আই আৰো ৰুজু কৰা হৈছে বুলি আৰক্ষী বিষয়াগৰাকীয়ে জানিবলৈ দিয়ে।
